O Redžep Redžepovski , si Roma taro Kumanovo, R.Makedonia počminela pli sportsko storia bašo baro boksersko anav thaj so lelja i silber medalja ki Olimpiada ko Los Andželes ko 1984 berš, kote pobuter taro 18 berša na kerel buti ko sporti. Holjamo ko manuša thaj institucie ov vakerela kote an i them isi love bašo aver dilinipa, numa na den love te kerel pe suporto e profesionalno manušenge so ple kerde sukcesencar hramnosargje i sportsko historia.
„O them chidingja amen an i rig, na kamel amaro džanlipa. Me o sporti sikliljum le ko lumiakere ringia - arene thaj čače si bibahtake te našti te sikavav e avere generecien mo džanlipa. Sako sportisti si majbaro ambasadori ple themake. I diz Kumanovo isi la olimpisko medalisti an i penzia, numa mukhlja da 15 berša te ovav ko droma, so načti khuvel ki sportsko hala bašo boks te kerel klubi te šaj khedel e talentirime čhaven. A isi talentirime čhave an o Kumanovo thaj Makedonia, numa nane ko te kerel buti olencar. Bašo akala 20 berša dži akana ka kerav sine majhari pandž olimpijcia" vakerela o olimpšisko medalisti so angleder 32 berša sine barvalipa e Kumanoveske, a akana si bisterdo savorendar.
Angleder deš berša počmingjum te kerav buti ko boksersko klubi "Kumanovo" i bašo jekh berš ki individualno konkurencija kergjum nacionalno šampioni lelem nekobor medalje numa na sine man suporto. E dizjakoro šerutno o Zoran Damjanovski na mangla te del ni 100 eura . Taro tegani na kerav buti pobuter. Čače si bibahtake me ko mle 54 berša kana šaj majbut te dav ko boski sar treneri thaj meadžeri, me sem avrial taro boksersko ringo.
I olimpisko medalja lelja la kana sine le 22 berš. thaj vakerel kote tegani nadžangja ni korkoro kobor isi pharipa akava sukceso.
Ki pli barvali boksersko kariera o Redžepovski, 9 berša sine reprezentativco an i Jugoslavia , thaj 5 berš nacionalno šampioni kote tegani gejnel sine 20 milionia manuša. Plo sikceso thaj resiba olimpisko, mediteransko,, balkansko thaj nacionalno šampionati kergja le soske sine le but šukar treneria, majanglal O Bruno Hrastinski so sine treneri e jugoslovensko boks reprezentaciake , thaj o baro motivo te ovel le sukcesi an o boksi so reslja le palo bare treninzia so sine em po 6 saatia kana sine bare mečia.
„Me počmingjum ko 1978/79 ko BK " Kumanovo" kote o treneri Miroslav Petrović an i sportsko sala "Sokolna". Nekobor masekonge uljum šampioni an i Makedonia, a palo 7-8 masekoja thaj an i Jugoslavia. Agjaar aljum ki selekcia an i reprezentacia so valjani sine te džal ki Olimpijada . Anglal i Olimpiada intenzivno trenirinav sine štar masekoja ko sportsko centari "Košutnjak" ko Beograd. Ko finale sine man boks meči e Amerikancoa Stiv Mekkrori thaj o finale našavgjum le rezultatea 3:2, numa o arbitria sine oleskere rigatar. Sine man salde 22 berš thaj ni korkoro nadžanav sine so ovel mancar thaj kobor si importantno akava sukcesi. te ovav akana akale gogjaja ko odova vakti but bukja ka džanav sar te kerav olen , ama tegani sium sine čhavo ki jekh čoroli romani familia. Mo dat kerel sine buti ki dizjakiri higiena thaj tikne plataja , thaj parvarel sine efta čhaven, thaj phareste ikljova sine ko agor" vakerel o Redžepovski.
Mukhlo korkoro bizi buti, pobut taro deš berša ple 6 dženengere familijaja dživdinel sine taro socialno taro 50 eura ko masek, palo so ko 2010 berš reslja themakiri penzia bašo oleskere sukcesia an o sporti.
Ko vakti kana sine i Olimpijada ale kolekcioneria tari Amerika thaj den man sine 10.000 dolaria te bikinav i medalja. Angleder desavo vakti nesave manuša rodingje man prekal internet, numa nane te dav le, kobor da te ovav bi lovengoro. Mange akaja medalja nane la moldi.
You tube:
