O Sejfula Beriša boksersko reprezentativco tari ex Yugoslavia udžargja oleskiri familia te ovel atakujmi , a te na ovel an i situacia te del suporto.
"Ka lav miro pasporto , ka pharavav le thaj ka džav mange tari them kaskoro flago baripaja vazdavale sine ko internacionalno šampionatia , a akana udžargjum te maltretirinel mire familia ko salde 200 metria taro miro kher. odova da udžargjum te ovel mange? vakerel o Beriša, kote maškar o manuša si pendžardo panda anavea "Kubanco"
As o oleste o incidenti ulo an o pašipa lokalno menuvačnicake , kote oleske pendžarde lokalno policajcia so sine mate thaj gazda e kafanake počmingje te maltretirinen thaj te khuven oleskere romnja, džamutre thaj e duj e čhaven.
Ov palo tikno vakti alo thaj aso i situacia kergja tromale thaj na pašlilo an o provokacie.
„O sporti angja mange sukceso thaj rejtingo thaj na manglem sar kula taro karte te peravav mo dživdipa manušenge so fakti si kaj neko an i them učharel len. Na kamav prtivilegie jekhutne kamav e manušen te krisinen sar so trubul, soske mire familia thaj čhaven panda isi len bare traume, vakerel o Beriša.
O manuša so kergje atako sine mukhle palo notirimo akti khere thaj ka ovel li kriso upral olende panda na džanel pe.
Dži kote i them na kerel khanči , na ačhol aver numa te lel o pasporto te pharavel le thaj te3 džal peske akatare trujal si sakote an i lumia baripaja vazdav sine mire trin naja, notirinel o Beriša.
