Te šaj ana tumenge i atmosfera thaj mediumsko atrakcia: Den tumen godi kote i Ryiana zamangel nesave terne romane čhave so bikinel ko kurko ki Šutka thaj taro jekh drom mangen ko Skopje te keren bijav.
Asavki atmosfera sine ko 1981 berš kana ko Skopje sine o "majbaro bijav" kana o pendžarutno giljavutno tari teganutni ultra pendžarutni grupa Bony M, thaj olakoro frontmeni o Alfons Bibi Farel, ulo romano džamutro kote romnjake lelja e Romane čhija e Jasmina Šaban taro Skopje.
An i ceremonia tari prandin udžarkergje olen upreder 20.000 Skopjania. Ko 1981 berš odova senzacionalno bijav nakhavgja i ceremonia thaj so kergje la i Ledy Diana thaj o princo Čharls.
Ola sine an i konekcia štar berp angleder te keren o senzacionalno bijav, a palo odova i 18 beršengiri Jasmina thaj o Bony M angje decizia te keren akava senzacionalno bijav e deceniakoro. Ko avgo momenti o dat e Jasminakoro o Nevzati thaj olakiri daj i Mizaketa sine kontra. Numa o mangipa viktoriringja.
Kolona taro vordona e ternencar i bori thaj o džamutro dikhlja len upreder deš milje manuša. O bijav kergja pe ko hoteli "Kontinental" ko Skopje.
Angleder o hoteli sine thaj dežurno policia soske sine but manuša so mangle te dikhen akaja senzacia.
Ale but mediumia, thaj TV stanice tari Germania thaj Britania.
Jekhutne so snimingje akaja ceremonia sine i produkcia "Vardar Film" taro Skopje. Oficialno an i hala sine 360 akahrde misafiria.
Ola tari prandin hulavgje pe ko 1998 berš. Tari odoija prandin sine len duj čhave, i Zanilja thaj o Zanin. Avdive i Jasmina Šaban dživdinel ki Holandia. O Bobi Farel mulo ko dekemvri 2010 berš ko 61 berš phuripa.
