Sar avena majpaše o lokalno alusariba an i R.Makedonia, agjaar bajron o apetitia e funkciake - Dizjakoro šerutno an o komune. Sar aktuelno top -tema si i funkcia an i jekhutni romani komuna Šuto Orizari.
Aso dži akanutni konverzacia maškar o roma an i akaja komuna sar anava so si liferujme sar buteder anava sar kandidatia.
Saste si pendžarutne kaj o SRM ka notirinel pire kandidate kote o džiakanutno dizjakoro šerutno e komunake Elvis Bajram . Aso desave špekulacie liparel pe o anav da taro aktuelno deputato an o parlamento thaj lideri e partiake SRM - Amdi Bajram.
Ko jekh o dži akanutno koaliciono partnero an o VMRO - DPMNE i partia ROM kamel te promovirinel e Jaše Sefer. Taro OPER sa buteder liparel pe o anav taro eks dizjakoro šerutno thaj ministeri Neždet Mustafa.
Taro DSR kote si akana sasti konfuzia, thaj čačutni katastrofa nane ko te ovel kandidirme saste pendžarde soske olende isi len duj opcie. Akala si o anava so dži erati sine an i koalicia e DPMNE-a.
So legarel pe e kandidatenge so si paše an o aktuelno legaripaSDSM akanske isi but napendžarde špekulativno anava! Aso o špekulacie isi nekobor anava e kanditenge akale funkciake.
Sar jekh taro odola anava si o pendžarutno biznismeno tari akaja komuna Asan Ferat, so panda udžarel definitivno konkretizacia sar suporto taro SDSM jali eventualno ka džal sar biathinalo kandidato. Ko odova konteksti e SDSM figuririnena thaj avera anava sar so si o aktuelno deputato an o Parlamento taro SDSM o Kuco Duduš, a desave špekulacie džana dži odorig e anavencar taro dži akanutno NGO aktivistia sar so si i Fata Osmanovska!
Ko desave kuolaria liparen pe anava thaj sar so si o membro an o Komunakoro ofiso an o Šuto Orizari o Hasan Edis.
Ko jekh trubul te notirinel oe thaj o anav taro Tefik mamut romano aktivisti so ko akava momenti si avrial tari R.Makedonia.
Taro albanikano politikano bloko si totalno napendžardo dali ola ka den desavo piro kandidati. Numa nane palem dur o 4 septemvro - o agorutno roko te aplicirinel pe kandidatura thaj te ikljol panda desavo nevo anav.
