Aso naoficialno informaci tari rig e veb portaleske "24 Vaktia" a panda nazojrakerdi lista kandidatia bašo dizjakere šerutne thaj lista konsiliaria ki jekhutni romani komuna an i Makedonia , ki Šutka sa si an i sfera -špekulacie.
Panda nane dekreti tari ni jekh romani politikani partia bašo kandidatia em i lista.
Aktuelno an o momenti si kote majsiguritetno o Elvis Bajram taro SRM ka kerel te resel plo trinto mandati. Ko jekh maškar o aver partie so si an i koalicia e SDSM-ea ka anel decizia maškar o anava Asan Ferat, Kurto Duduš, Tefik Mamut, Gege Demirovski si sa sar naoficialno variante.
Numa isi aver momenti. Naoficialno sar legarutno e listake Konsiliaria taro SRM ka ovel o Amdi Bajram? Si li odova taktika jali plani?
Džanel pe kaj o Amdi Bajram si presidento an o SRM thaj aktuelno deputato an o makedonikano Parlamento! Pendžardo si oleskoro kredibiliteto maškar o Roma an i RM. Neko del komentaro: "Taro grsat an o her"!
Numa isi aver da variante. Te sine sa akava čače , džanlipaja o rehtingo taro Amdi Bajram maškar o Roma an i Šutka, šaj but lokheste te lel majbaro numero membria taro Konsilo e Komunake an i Šutka taro SRM thaj palo odova jekhutne te mukhel ov odoka pozicia thaj te iranel pe sar deputato!
Šaj sa si špekulacie thaj šaj si sa taktika!. Vakti si lokalno alusaribaske, thaj sa si mukhlo sar variante!
