Avgo drom sine havljardo o konkursi te den pe 30 stipendie ničale studentenge Roma hramosarde ko postdiplomsko studie avgo ciklusi ko javno thaj privatno univerzitetia an i Makedonia akale akademsko 2015/16 berš.
O vice ministeri baši edukacia Spiro ristovski thaj o direktori bašo Ofisi ko progresi e edukaciake ko čhibja taro preperutne e jekhinenge Redžep Ali Čupi havljargje kaj an i specializirimi rig taro MEN www.stipendii.mon.gov.mk avdive avgo drom ka ovel havljardo konkursi dejbaja 30 stipendie bašo ničale Roma stiudentia.
-Deš stipendie ka den pe romane stuudentnege, themutne an i Makedonia so si hramosarde ko avgo berš studiriba, dži kote 20 stipendie romane studentenge so si hramosarde an o dujto jali majuče berš studiriba.
O finasie ka oven 5.000 denaria ko masek, thaj den pe 9 masekonge ko thavdipa taro jekh berš, notiringja o Ristovski.
O zainteresirime kandidatia šaj aplicirinen dži ko 11.02.2016 berš a dokumentia so valjani te den dži ko ofisi šaj huljaven le tari veb rig www.stipendii.mon.gov.mk thaj te den len dži ko Ofisi ko progresi e edukaciake ko čhibja taro preperutne e jekhinenge ko Ministeriumi baši edukacia ko drom: Sv.Kiril thaj Metodij numero 54 - 1000 Skopje.
-Ekstra teloikerin so del pe e Romenge studentenge so studirinen ko fakultetia jali studisko grupe so producirinen profesorsko kadari, so ka ovel len prioriteti ko konkursi. Importantno si ko periodi so avela te kerel pe stručno edukaciakoro kadari tari romani jekhin resarinaja te kerel pe o niami ki dajakiri čhib so si garantirime prekal o Ustavi. Trujal odova trubul thaj kadar taro edukatoria Roma so ka keren buti ko ničale fundavno thaj maškarutne škole thaj te oven kotor taro edukaciakoro - pedagoško sistemi sar o javer jekhina , vekrgja o Čupi.
