Te šaj ikaven pe neve personalno dokumentia baši identifikacia e neve anavea tari them udžarel pe te startujnel taro agor e beršeske , a i trampa o dizutne ka pukjinen la korkoro. O trampe ka džan etapno.
-O fundavutne dokumentia : personalno karta, pasporto, trafikoskoro sertifikato, te ačhile aso o akanutne moldia, sako dizutno ka trubul te pukinel paše 40 eura.

Akate te dophergja pe o trampe an i registarsko tablice vordenge tegani i moldi ka bajrol bašo paše 20 eura. Sa sublimato odova ka avel paše 60 eura.

Majtargetirime ka oven okola dizutne so ka trampinen pire dokumentia ko akava periodo sa dži kote na anen pe o neve e neve anavea , soske o dokumentia ka oven ko jekvaš roko taro istemalkeren pe , thaj ko than jekh drom ko deš berša, ola ka trubul te trampinen pire dokumentia duj droma.

I trampa e dokumentonge sar so havljargja o Govermento ka ovel ko dumo taro dizutne. Aso aktuelno moldiakiri lista, majbut o dizutne ka trubul te hulaven bašo pasportia so si 25 eura, plus administrativno taksa so si 5 eura e personenge so si phureder taro 27 berša jali taro 2 dži ko 3 eura okola so si majterne taro 27 berša.

I moldi tari perosnalno ID karta si 3 eura. O trafikoskoro sertifikato si 4.5 eura thaj olake isi administrativno taksa so si 3 eura so pukjinel pe sebepi nakhlo validiteto.

Ko akala fundavutne love konektirinel pe thaj i trampa taro registarsko tablice e dizutnenge so si len ko vordon. O tablice dži akana sine 20 eura. Ko neve tablice ka den pe ko roko taro 4 masekoa, o purano simbol kodi „МК“ ka ovel tranpime e kodoa „NMK“ (North Macedonia).

O premieri Zoran Zaev zojrakergja kaj i statistikani operacia so ka ovel kerdi o berš so avela ka ovel thaj grafa - etnikano preperutnipa e dizutnenge so angleder sine notirime kaj šaj ma te ovel akaja grafa, thasj salde šaj te vakeren savi čhib istemalkerena sar dajakiri čhib.

-Savore notiringjem kaj ka ovel i grafa etnikano preperutnipa soske si but importantno e tikne minjoritetonge. Sar egzamplo i romani jekhin but hari paše raritetno istemalkerel pli dajakiri romani čhib thaj te sine čhivdo salde i čhib so ka ovel ani odoja grafa tegani šaj ma te anel o čačutno numero tari akaja jekhin, vakergja o Zaev anglal i promocia e Operativno planoske bašo bukjarnipa bašo 2019 berš.

Odole aspektostar, potencirinela o premierui sar solidarno preperutne tari majbari etnikani jekhin angjem decizia thaj kergjem barabutno akcepcia te da motivacia e EUROSTAT-eske thaj e TOS te ovel olen i grafa bašo etnikano preperutnipa.