O pandžberšengoro Robika Čorba thaj oleskoro dat o Robert Čorba sine mudarde odoleske salde so sine Roma an o 23 fevruari 2009 berš.
I seria terori upral o Roma počmingje an o 2008 berš kana grupa ungariakere sketremistia astarena sine e Romen.
I seria taro atakia kergja te oven mudarde šov Roma. E kriseskoro procesi bašo štar notirime persone so kergje o atakia sine saste duj thaj jekvaš berš, a i definitivnao andi decizia an o Avgust 2013 berš. Trin džene sine krisime savakteskoro dživdipaskoro phanlipa, a jekh sine krisime 13 berša phanlipa.
O atakia sine akale hronologijaja:
21 Juli 2008, Galgajork. Pali i jekvaš i rakj sine phajrarde 10-15 kuršumia taro pištoli ko trin romane khera. Ko incidenti na sine ratavrde.
8 Avgust 2008, Piriče. Tharde sine duj romane khera molotovo koktelencar. Jekh Romni sine khuvdi kuršumea ko vakti kana ikljola sine kheral.
5 Septembro 2008, Niradoni - Tamasipusta. Phajrardo si premal jekh romano kher kote dživdinel sine dat pe štar šhavencar ko vakti kana sovena sine. Na sine ratvarde.
29 Septembro 2008, Tarnabod. Frdime sine molotovo koktelia ko štar romane khera. Na sine ratvarde.
3 Novembro 2008, Nagičec. Frdime si duj bombe ko duj romane khera . Ko vakti kana našen sine taro plo kher mudardo si Rom 43 beršengoro thaj Romni 40 beršengiri.
15 Decembro 2008, Alzocolka. Phajrarde si premal duj Roma. O Rom (19 berša)sine phareratvarde, a oleskiri partnerka nakhlja lokhe ratavribaja.
23 Fevruari 2009, Tatargengorgu. Frdime si molotovo kokteli upral romano kher. Ko vakti kana našen sine taro plo kher mudarde si Rom (27 berša) thaj oleskoro 5 beršengoro čhavo. O aver duj čhave si ratvarde a i daj nakhlja bizo ratvarina.
22 Aprili 2009 berš, Tisalok . Djeno Koka - 59 beršengoro romano dat ko rakjakere saatia kana avel sine tari buti sine mudardo anglal plo kher.
3 Avgusto 2009 berš, Kisleta . 45-beršengiri Meri. B thaj olakiri čhaj sine atakujme taro napendžarde persone an o olengere khera. Ačhile dživde numa phare ratvarde.
