I 13-beršengiri Džesika Memiševska so taslili ko bazeni Dovedžik ki Bitola mangipaja te kurtalinel pire 12 beršengiri bratučetka kasaja barabutno nangjona sine vakeren i paše familia e čhijakiri.
I Džesika džanela sine hari te plivinel a olencar sine thaj aver čhave , sare tari bitolsko romani mahala "Karton Mahala" so si ko pašipa e bazenteske.
„Ola nangjona sine sar so vakerel mli čhaj . Majanglal ko pani rupingja i Džesika, a palo odova mi čhaj. i Medina Kamber. Kana oj rupingja počmingja te tasljol . I Džesika mukhlja pe te ikavel ola ple bratučetka, numa kana vazdingja oj geli telal o pani a me čhija ikavgje ola.
Ko odova dengja suporto em jekh javer romni so sine odothe a sine em aver manuša. Mi čhaj počmingja te vakerel " mi bratuletka tani tele" thaj palo odova o pani frdingja avrial mire unika" vakergja o Nehru Kamber o kako e tasavde čhajake.
O bazenti so olea kerel buti privatno koncesioneri panda nane phravdo bašo manuša te nangjon akaja sezona. Numa i paše familia e čhijakoro vakeren kaj andre šaj te khuvel pe bizo problemia soske ni jekh na arakhel o bazenti.
Pučena soske na sine sekjuriti em roden džovaplipa e rtagediake. Vakeren kaj o čhave džana sine te nangjon odori , sine em aver manuša so keren sine rekonstrukcia e bazenteske e nilaeskere sezonake, znači na sine ola korkoro odothe.
„Olencar sine em avera čhave. Te sine neko te na mukhel len odori , ola nane te khiven da sine andre. trubul sine te ovel čhivdo sekjuriti em o objekti trubul sine te ovel šukar arakhlo" vakerel o Kamber Maksimid , kako e čhijakoro.
Taro "Streževo" vakergje kaj o bazeni si dendo telal koncesia panda angleder thaj palo akava detalno ka dikhen i dokumentacia taro kerdo kontrakto.
