O Romane čhave so hramosarena pe ko avgo jekvaš sikljojbaskoro berš majbut ačhoven bizi škola panda ko starti thaj ikljoven olatar. Paše 50% čhinavena pli edukacia taro diferentno karane , maškar so pharipa thaj napendžariba e čhibjake , thaj našajdipa te den džovapi so rodel pe ko vakti tari edukacia.
“Čhinaven i edukacia soske na džanen lačhe i makedonikani čhib, thaj našajdipa te konektirinen pe an o edukaciakoro procesi" vakergja o Monsinjor Anton Cimoritić - Direktori e Makedonikane Karitaseske.
Te šaj bajron o šanse e Romane čhavenge te educirinen pe o humanitarcia sar so si i organizacia Karitas , finansisko suportoa an o donacie tari Polska, rotirinen o proekti vash majbari olengiri integracia an o edukaciakoro procesi. Ko učiba taro 16.000 eura kerdo si kotorvali modernizacia e školsko objekteske taro Karitas so sikljovena paše 100 čhave:
“Kobor so džanava paše 100 romane čhave avena thaj sikljovena thaj realizirinen pire sune" vakerela o Jacek Multinovski - ambasadori tari Polska.
Trujal o čhave tari komuna Šuto Orizari bizi edukacia ačhona panda paše 150 čhave sp dživdinen an o improvizirime romane mahali telal o Kale. Aso o kanoni baši fundavno thaj maškarutni edukacia o jeria so na legaren pire čhaven an o škole šaj te oven globime.
