An o palokurko ko 1 April i Gordana Siljanovska Davkova, Stevo Pendarovski thaj Blerim Reka startujnena pire kampanje ko šovto presidenteskere alusariba.
I Siljanovska Davkova si presideneteskoro kandidati taro VMRO - DPMNE thaj i koalicia, o Stevo Pendarovski taro SDSM thaj i koalicia, a o Blerim Reka tari Aliansa e Albancongiri thaj i asociacia Besa.
I kampanja bašo presidenteskere alusariba ka ovel sa dži ko 19 April , palo so avela 24 saatenogor moratorium , anglal o dive taro alusariba.
Aso o akcentiribe taro alusaribaskere štabia o kandidatia ka vizitkeren paše sa o thana - lokacie ko dikhiba e dizutnencar thaj mitingoa ko majbare dizja. Dena lafi kaj ka ovel tromali thaj fer kampanja.
Ko aviba e oficialno startoske taro presideneteskoro alusariba , apel bašo fer thaj tromali em regularno alusariba dži ko kandidatia , politikane partie thaj dži ko dizutne bičhavgje thaj e themakere representoa thaj e Themakiri Alusaribaskiri Komisia - TAK.
O nevo presidento ka šaj te alusaen ole 1.808.131 dizutne so isi len niami te den vota a si registririme an o Alusaribaskiri lista.
Aso kerdi ždrepka an o TAK , an o lil hangibaske o Reka ka ovel telal numero 1, i Slijanovska - Davkova numero 2, a o Pendarovski numero 3.
O avgo alusaribaskiri rota taro akala šovto an o niče presidenteskere alusariba si notirime bašo 21 april, a i dujto rota ka ikerel pe an o 5 maj.
Aso o makedonikane kanonia o kandidati bašo presidento šaj te legarel i viktoria panda an i avgo rota dži kote resel upreder 50% taro vote taro sa o registririme dizutne an i Alusaribaskiri lista.
te na sine agjaar ka ikerel pe thaj dujto rota ko 5 maj kote than ka len o duj kandidatia so resle majbut vote an i avgo rota. Ko jekh trubul ki dujto rota te ikljon majhari 40% taro registririme te šaj o hangiba ovel regularno thaj oficialno. O mandati taro aktuelno presidento Gjorgje Ivanov agorkerela ko 12 maj 2019 berš.
