Trubul te vazda amare baja , te kera majodoriga buti barabutne te šaj te dikha savi si i majšukar forma so isi amen ko momenti , a isi amen Govermenti so kerel buti, isi amen nevi energia maškar o terne Romane lideroa ki them em isi amen suporto tari EU.
Akala trin riga si šukar starti . Te kera jekh diferencia te lačhara i situacia vakergja o euroambasadori Samuel Žbogar.
– Čačutni buti baši inkluzia e Romenge panda nane agorkerdi numa si anglal amende. O ciklusi taro čorolipa, diskriminacia thaj inkluzia e Romengiri isi panda - vakergja o Žbogar.
Ov vakerela kaj kotor taro akanutne problemia si notirime ko akaleberšeskoro raporti e themake tari rig tari Europakiri Komisia.
Odola si o Roma so mangen devlenge ko droma , romane čhave so na džan ki škola, Roma so dživdinen ko naelementarno šartia, ko nalegalno mahale, bizo dokumentia identifikaciake em keren buti ko gunoja. Isi panda prandina tikneberšengere thaj aver forme tari diskriminacia.
O Žbogar informirinela kote ko momenti si finalizirime o alusar taro studentia em sikle so ka len stipendije baši elementarno edukacia, kerel pe grant programa te lačharel pe i infrastruktura ko Romane mahale.
