Ikljola sine i javin, thaj salde so džangavgjovela sine o dive sine notacia kaj i 25 beršengiri Romani džuvli tari Purani Topaana trubul te uštel te tharel i jag anglal i tikni avlin anglal o purano kher thaj o kazani šeencar te ovel čhivdo te kejrol , te thovel thaj palo odova te šukjon o šea.
I terni Romni lo peste vakergja:" Avdive ka ovel palem tato sar erati, ka šukjon o šea but sigate".
Kana o pani takjola sine, lelja i purani metla te šulavel i avlin, a angleder koga panjea prskingja la ma te uštel praho.
I jag telal o kazani počmingja te thabljol majbut em o pani te keravgjovel. Odova sine momenti kana oj lelja i purani kopana em o sasto kazani e šeencar čhorgja le ki kopana.
Bešlja trujal i kopana em počmingja pe vastencar em sapunea zorale te morel o šea te šaj oven poparne em majthovde
Ko momenti kana thovel sine o šea te oven majparne taro jekh drom šungja čhavorikano roiba andral taro purano kher.
Irangja pe dikhlja prekal o udar taro kher em korkoro peske vakergja:" Ah bre mo čhavo akana li arakhljan te robe. . Šaj bokhalo ka dav le thud. But rano uštiljan . Pandž si o saato!"
Khuvgja andre ki soba so sine čorolikane kerdi lelja e tikne čhave taro jorgani em dušeko so sine em e tikne 1.5 beršengere čhave lelja le ki piri angali.
. O čhavo rovela sine soske mangel sine thud em sine bokhalo!
Iklili taro prago e purane kherewstar bešlja anglal i kopana e šeencar em dengja le i čuči te piel thid.
O čhavo dikhlja kaj si odova e dajakoro thud, čhinavgja rojbaja em počmingja te piel o thud.
Em ko vakti kana o tikno čhavo piel sine tromale o thud ki angali pe dajakiri taro jekh dromsar telelphuvjakoro buka šungja pe em i phuv te tinanel.
O tinaniba em zorali buka uli haotično daravutni nakontrolirimi katastrofa.
Šunen pe sine haotično pište em vika so našti bistrel pe. O purane khera tari Purani mahala jekh palo jekh našavgjovena sine taro horizonto.
Na sine majlačho ni o purano kher so angleder 3 minutoa sovel sine tromale o tikno čhavoro andre , o duvaria andral pele jekh upral javer ko than ko dušeko em čaršafo kote sovel sine o tikno čhavoro.
Sine 26 juli 1963. O saatoa sine 05:17
Miro teganutno čhavorikano roiba sine rojbe te džal miro dživdipa majodoriha!
Agjaar manglja te ovel!
Akava si prekal i notacia tari miri akana rametlika muli daj aso olakiri memoria ko avgo momentoa taro katastrofalno phuvjakoro tinaniba ko 26 juli 1963 berš.
Youtube:
