Motivo bašo atako ko Hanau, Germania si ksenofobia em kaj o 43 beršengoro Tobijas. R. em oleskiri daj sine arakhle mule ratvarinaja taro pištoli ko olengoro kher , vakergja o ministeri andrune bukjenge ko regioni taro Hessen o Piter Beut.
Ko Hanau, diz paše o Frankfurt ofto džene mule idžerati, kana ov kergja duj šastrale atakia ko šiša baria – nargile.
Jekh taro ratvarde mulo ko hospital , kote o ratvalo bilansi si 9 viktimia. Maškar o mudarde sine majbuter Turkilie em Kurdistania.
O Tobijas R. mukhlja pali peste manifesto taro 24 riga em nekobor videa kote so ilustririnel piro dživdipa. Kotora taro manifesto havljaren em e germaniakere mediumia , sikavibaja kaj o manuš so kergja o atako sine ekstremno radikali so sine le psihološko problemoa.
Ov na kamel sine sa e migranton, bizi diferenca kotar ola avena.
"Te manglen te faisalkeren o problemi e stransko kriminalconcar , na trubul te atakujnen e avurtne naamalen, numa te viktoririnen e andrunen. A odova šaj teovel tumari nacia“ vakerel pe ko manifesti , dopheribaja: „ Na sako so sile germansko pasporto avdive si uže rateskoro, em trubul te eliminirinel pe jekvaš taro dizutne“
Trujal odova o Tobijas R. sine paranoično em mislinel sine kaj opservirinen le “specijalno policia” panda sar čhavo.
Ko manifesto vakerel pe kaj ulo leske klar dikhlo kaj o 11 septembro 2001 berš dive kana sine atakujme o Lumiakoro Biznis Centro . Ov vakerel kaj o Donald Tramp em o Jurgen Klop fudbalsko treneri ćorgje oleskere idee.
