O Safet Demirović (45) si taro o gac Lepenica em taro ple majtikne berša pletinela korpe em košia taro vrbakere salčina – granke. Palo odova ov bikinela len ko gava em o dizja ki Južno Srbia rm agjaar egzistirinela.
Ov vakerel kaj prekal o nilaj khedela o kašta trujal i len Morava, palo odova šukjarela len.
- Akava zanati sikliljum taro phureder . Amen o Roma tari Lepenica siem pendžarde akale zanatoa .
O tikne korpe kerava len bašo jekh saati. E Košeske valjani mange hari pobuter vakti – vakerel o Safeti.
O tikne korpe bikinava olen bašo 4.5 eura , a o košia bašo 12 eura, a džanav te pomukhav em ko 8 eura. O manušpa but hari kinena akala artikloa soske ko gava na arakhen pobuter stoka em na valjani lenge akale pletime košia.
Akana nane nisavi diferenca dživdine li ko gav jali ki diz . Nekaste so nane love te pukjinel me dava o korpe em o košia em hajbaske. O koršpe majbut kinena len o majčorole manuša, a o barvale namangena te kinen akala bukja.
Ov vakerel kaj akaja buti kerel la ko jevend , soske ko akava periodi nane but buti sar so isi nilaeske ko polija sar argati.
