Kana viktoriringja ki lokalno trka ki Slovakia angleder duj berša, olakiri fotografia ko troni sine realiteto em dikhel le buteder džene. Ki paralela e čhajencar so sine ko 2-to em 3-to than so sine len orginal atletsko patike prastajbaske I 13 beršengiri Anamaria Horvatova tergjol sine ko majuče ko piedestalo ko pire baleteankencar.
„Oj si la talent em but kerel buti” vakerel o treneri o Norbert Pece ko pučiba sar šaj majšukare te ilustririnel e terne romane atletičarka. Oj bajrola ko mizerno šartia dživdipaske ki romani mahala. Pali odoja viktoria oj relja em sportsko patike taro sponzori , a o Atletsko klubi Moldava Nad Bodvu lelja la ki peste te trenirinel.
Oj tegani sine em vizitkerdi taro teganutno slovakiakoro president o Andrej Kiska so dengja la bari šukrikerin em manglja lake but sukcesi ko sporti, ki škola em ko dživdipa.
“Ko starti sine amen hari provlemi ki komunikacia – I Anamaria na kerel sine lovačjo lafi numa salde romane em hungariakiri čhib” del ape godi o Pece so si em president ko akava atletsko klubi, „Kera sine lafi ki hungariakiri čhib em kergjem but lafi. Oj dživdinel ki koliba, olakere horizontoa si limitirime , em kera sine zori te da la suporto so šaj te resel majbuteder medalje. Oj anela amenge bari baht em loš ko odova konteksti. Amen da la suporto em materialno , thovaja olakere šea, kana džaja ko mitingioa, pakjujna olakere šea, ki škola pukjina olakoro hajbe te ovel majkvalitetno sako dive džaja ko šopingo” vakerel olakoro treneri.
