O šefoa taro trin majbare institucie ki Europakiri Unia akala dive definitivni e keribaja signatura thaj parafi e finalno regulativaja oficijaliziringje o istemalkeriba Kovid pasportoa te šaj tromale dromarena ki Unia ko vakti tari i pandemia.
Ki ceremonia tari signatura thaj lele o Presidentia taro Europakoro parlamenti David Sasoli,taro Konsili e Europakere Uniakoro Antonio Kosta thaj e Europakiri Komisia i Ursula fon der Lajen.
I resarin taro digitalno dokumento si te šaj lokharel pe o siguriteto em tromalo dromaripa ki EU ko vakti tari pandemia e Kovid 19. Sa e evropejcon si len niami tromale te phiren , a o sertifikati ka kerel panda majlokheste te šaj phiren em ka ikavel len tari situacia ma te rodel pe lendar em karantini. O sertifikati ka ovel kerdo ki digitalno forma em lilalo dokumenti em ka ovel dendo ko sa o oficijalno čhibja tari EU. Odova ka del o informacie odole so si le adava dokumento sar so si dali sine nasvalo taro kovid, vakcinirime jali testirime taro koronavirusi. O sertifikati ka ovel bilovengoro. I regulativa ka ovel oficijalizirimi ko 1 juli 2021 berš thaj ka overl ko takati 12 masekoa.
