Rom so mulo ki čehiakiri diz Teplice kana policajco upral leste kočakaja sine negirinela kaj kergje ola i bibah. O Stanisalv Tomaš (46) mulo ko 19 juni ko vakti tari policijakiri intervencia. O video so sine hulavde prekal socialno netvorko em mediumia dikhela pe kaj o policajco preja sine upral oleskiri men paše 6 minutia, Prekal o avgo raportoa o Stanisalv mulo ko vordon taro medicinsko arka . Ov sine astardo tari i policia ko vakti tari intervencua sebepi so vandalizirinel sine jekh vordon ama e čehiakiri policia thaj i them čhuden odoja verzoa kaj olakl mudargje ole ko vakti tari olengiri intervencia,
Ko policiakro raporto tergjola kaj ki intevencia em kerdi obdukcia nane šansa te ovel mudardo olendar numa o doktori vakergja kaj ov mulo taro predoziriba e drogaja sar preliminarno faktori meribaske.
I notacia taro roma em o video snime seiozno dena o pučiba e dikhel pe kaj šajdutne i policia si bangi so mulo o 46 beršengoro Tomaš. Ko agor e videoske dikhel pe kaj o policajci ikeridno pi kočak dikhel kaj ove na reagirinela pobuter . Akava incidenti nane izolirime, Aver da droma sine aavke policiakere em ekstremno nacionalistikane atakoa upral o Roma ki Čehia.
E policiakoro ekstremizmi hor khuvgja ko romano dživdipa.
O representoa tari ehia ko EU na dengje nisavo džovapi ko pučiba taro “Brisel Times” e incidenteske tarh sar kerel pe e policiakoro rodaripa akale incidenteske.
