Ki vaktavin mediumenge editirime akala divesa taro Generalno inspektorati arakhibaskere takatia (GIBS) akcentirinel pe kaj I policia aso olende na kergja nisavo mujal kanonikano akti ko vakti tari olengiri intervencia ko Teplice, Čehia persi juni kote so mulo jekh Rom.
O GIBS angja decizia kaj o meripa e Romeske si phanlo e iloskere nasvalipaja – kardiovaskularno problemia soske sine intoksicirime taro metamfetamini.
„O rodaripa arakhlja kaj e policiakiri intervencia mujal o Rom sine kerdi primal standardno procedura keribaja aktia so si validno em kanonikane so na sine faktori meribaske“ vakerel o portparoli taro GIBS Ivana Nguenova. O Stsanislav Tomaš sine zorea phanlo ko vasta lisicencar taro policajcoa ko 19 juni 2021 berš kana astaren le sine ko Teplice a palo odova ov mulo.
I video snimka ttaro policisko intervencia sine editirime taro o portal Romea.cz em sine hulavde ko socialno netvorko a e policiakiri intervencia sine but kritikujme taro čehiakere em internacionalno aktivistia em organizacie ki sasti Europa. Ki video snimka dikhel pe sar policajco kergja intervencia sar so sine upral o George Flojd , kalo manuš so sine mudarde ki USA ko masek maj 2020 berš.