Palo o sikavde rezultatia taro popis ki Republika Utarali Makedonia so rezultiringja cifrencar em indikatoria kaj an i them trujal o aver i Romani jekhin nane pobuter taro 2,53% panda na tromarela..
O Romano Demokratsko Sojuzi – RDS jekh a jekh reagirinela thaj si ki pakjiv e notirime punktoncar em faktia sikavde taro o Netvroko bašo sistemsko thaj savakteskere faisalia kote membria si 15 Romane NVO . An i reakcia e Netvorkoskiri maškar o aver tergjola:
„O faktia vakerena saste aver cifre. Amen na siem 46.468 em kaj siem 10.000 pohari taro 2002 berš si apsurdi bidikhlo.
Aver fakti si kote o Ofisi baši Statistika te amnestirinel i cifra taro registririme persone administrativno suportoa 132.260 jali manuša so o Ofiso statistikake na registriringja olen ko than istemalkerel sine i baza tari i themakere institucie.
Ko akava numero amen vakeraja kaj pobuter taro 70.000 si Roma a odova si upral akala funde em argumentia:
Ko vakti taro o popis sine majhari angažirime Roma popišuvačia
Ko vakti taro o popis o romane familie po desavo drom na sine da vizitkerime;
Ko vakti taro o popis khere pheren sine peske o anketno formularia;
Ko vakti taro o popis o kotor etnikano preperutnipa sine hramosarde ki turkiakiri, makedonikani jali albanikani čhib;
Ko vakti taro o popis namerno si mukhle odola 132.260 persone so špekulirinel pe savo nacionaliteto si ola.
Em ko agor o šubikeriba e upre notirime argumentenge džangangjovena pali i notacia taro o Direktori e Ofiseske baši statistika o rajo Apostol Simoski kote vakerel kaj o etnikano preperutnipa si hoš prekal so amen dikhaja odova šajdipa sar trampa jali šajdutno amnestiriba akale cifrenge so iklile ko akava POPIS 2021.
Odoleske amen džana kaj siam pobuter taro 100.000 Roma jali pobuter taro 4.76% ki Republika Utarali Makedonia,“ vakerel pe ki reakcia taro o Netvorko so o RDS ko jekh pakjala ko sa akala argumentia.
Jekh si sigurno. Taro akala sikavde cifre kobor tane Roma ki them o Roma si sar „POPARIME“. Majtragično taro odova „thariba „ em „tharde thana“ akana našti sasljaren amen ni 1000 plastično hirurgia a o „belegia“ em o „ratvarina“ taro akava popariba ka ačhon te dikhen pe majodoriga em ka dukhan. Sastipaja te legaren tumenge mire Romma o neve „luzne“!
