Reonizacia akava da berš si šerutno problem kana hramonjena pe I čhave ko avgo klasi ko škole ko Štip. Duj tužbe baši segregacia e Romenge isi ko adalatia ki them thaj ko Strazbur zojrakerel o stavi ki komuna baši reonizacia čače te respektirinel pe.
Jekh taro škole kote isi but rodaripa bašo transferi si o “Goce Delčev” em si jekh taro tućime riga barabutne e konumaja Štip thaj o Ministeriumi edukaciake. Taro 170 ćhave ki lista ki škola ko deš divesa dži ko agor e hramosaribaskoro rook dži akana si hramosarde salde 15 čhave ko avgo klasi.
Pali dendi prestavka taro ERRC baši segregacia e siklenge Roma, I Komisia baši protektiva tari diskriminacia ko masek fevruari akava berš angja thaj sasto propozalo I reonizacia ko sa o škole zorale te respektirinel pe , o direktoria ma te čhiven signature ko rodaripa e jeriengoro , a o Ministeriumi baši edukacia te zojrakerel o kriteriumia bašo prefrliba tari jekh an I javer škola.
Odolea na složinen pe o jeria so mangen te respektirinel pe olengiri alusar ki savi škola ka hramonjen pire čhave . Kana zari komuna reslja lenge notacia kaj olengoro rodaripa nane te akceptirinel pe kotor olendar na mangen te udćaren dži ko masek Avgust , em trampinen ardese dživdipaskere. Prekal o kanoni ko akti 63 taro Kanoni fundavno edukaciake e jerien si len niami te hramosaren pire čhaven ko aver škole. Jekhtuno šarti si I škola kote mangen te hramosaren pe čhave te ovel olen tromale thana palo agor taro hramosaribaskoro roko.