O nakhlo masek an I Čehia thaj Slovakia sine notirime 54 berša tari okupacia e Čehoslovakiake tari rig e askereske taro varšavsko pakti legarde tari sovetsko armada ko thavdipa e rakjake ko 20 avgust thaj javinakere saatia 21 avgusti 1968 berš ko vakti kana nekobor dizutne tari Čehoslovakia mule ko akava konflikto e askerea jail ki trafikoskiri bibaht so kergje len o okupatoria.
An o Košice , Slovakia jekh taro o protestantnoa sine mudardo a oov sine Rom o Bartolomej Horvat.
Jekh taro viktimia e okupatorenge sine Rom
I invazia an I Čehoslovakia taro trupe taro Varšavsko pakti ko 21 avgust 1968 berš mule sine 130 džene kote salde ko Košice mule 6 dćene maškar so em jekh Rom, o Bartolomej Horvat ko vakti taro avgo dive tari okupacija sine mudardo. Ov dživdinel sine ki Košice ki adresa Dobrianskeho 13.
O Horvat kerel sine buti ko tamikeriba khera em na sine prandime. Ov ko vakti tari invazia kerel sine ki buti ko tamikeriba e hotelske Slovan ko
Náměstí osvoboditelů (Ploštado taro tromarutne) an o Košice. Kana o okupatoria khuvgje ki diz pašđe ko 11 o časo ko 21 avgusti o Horvat iklilo primal o drom em hutingja upralal dan jekh tenko. Lopataja manglja te phagel I cevka taro periskopo e tenkoskoto Jekh askeri iklilo em taro avtomati phajrargja primal o Horvat O terno Rom reslja ratvarina ko vogji em ko vast.
Palo odova sine legardo ko hospitali ko drom Rostislavova kote so sine saste phare ratvarde duj kurke. Ov taro o ratvarina mulo ko 11 septembro 1968 berš.
