Ko 18 oktobro angleder 25 berša ko Beograd sine mudardo o deš thaj trin beršengoro tikno Rom o Dušan Jovanovič.
O Dušan sine mudardo salde so si Rom.
Sine mardo thaj khuvdo taro “skinhedsia” ko drom Beogradska ko centro e dizjake ki Slavia . Jekh taro o terne so mudarde e Dušan rodingja lestar love thaj bizo te udžarel peravgja le ko asfalto khuvgja le barea ko šero . O majbrutalno skinhedsi ikavgja em o metalno oluko thaj bukvalno margja le dži ko meripa e tikne romane čhave.
Palo akava brutalno mudaripa oleskiri familia geli te dživdinel ki mahala Mirievo soske našti sine te dživdinen ko than kaj sine mudardo olengoro čhavo. Pali akaja tragedia e Dušanea , majanglal muli oleskiri daj kote mudargja pe korkoro , a palo odova mulo thaj oleskoro dat o Aleksandar.
O mudaripa e Dušaneskoro si ladž savorenge amenge, e namanušenmge so mudargje le em mukhle fleka ko muj e dizjake Beograd , Srbia thaj buvleste.