E dizjakoro šerutno an i komuna Šuto Orizari thaj kandidati tari i koalicia VMRO DPMNE , Elvis Bajram erati ko mismeri sine atakujmo thaj ratvardo ko vakti kana kerel vizita pe time an i angloalusaribaskiri kampanja an i komuna.
Aso o informacie taro oleskoro šefi e Kabineteske, Adnan Memed so sine olea ola sine atakujme kana ale anglal o štabi taro oleskoro oponenti taro SDSM. O Bajram ratvardo sine legardo an o hospitalo 8-to Septemvri.
Trao ministeriumi bašo sastipako plo oficialno twiter profilo informirinena kaj o Elvis Bajram si avrial dživdipaskoro riziko thaj i ratvarin si leske sanirimi šov e thavencar.
„O SDSM majzorale na toleririnela atakia so kergja pe an i komuna Šuto Orizari . Udžarel pe o MAB te užarel akava akti dži ko agor, a okola so kergje o atako te oven sankcionirime anglal o kriso aso o kanonia.
Akharaja sa e dizutnen thaj politikane subjektia ma te peren telal o provokacie thaj te implementirinen o fer, tromale thaj demokratsko alusariba", notirinen taro SDSM.
O VMRO DPMNE majzorale reagirine ko akava fizičko atako upral o Elvis Bajram, notiribaja kaj akava si panda jekh zoralo thaj brutalno peraviba e alusaribaskere procesoske, a sa akaleske ola došakeren o institucie so si legardi taro Govermento an o čekat taro SDSM.
