O bilovengoro PAP testi, bilovengere kontrole e khamne džuvlenge, ničale patronažno vizite thaj avipa dži ko matično ginekologo, si panda na reslo niami thaj dendo lafi taro makedonikano Govermento bašo 8.000 romnja taro Šuto Orizari.
O protesto so ikergja pe anglal i ambulanta tari Šuto Orizari , o džuvlja tari akaja komuna leplivo trakencar ko muja thaj transparentia an o vasta , palem dengje o pučiba: soske o komoditeti so isi e aver džuvlenge an i them, nane e žuvlenge taro Šuto Orizari?
Taro Ministeriumia bašo sastipa vakeren kaj odova nane olengiri doš kote ko havljardo konkursi bašo ginekologo an o Šuto Orizari trujal i dendi stimulacia taro 250 eura , ni jekh na apliciringja!?
Ako o ministeri Nikola Todorov, nane le čhani te arakhel ginekologo ki akaja komuna (trujal subvencia so dela pethaj si konsekvenca bašo tikno vakti te faisalkerel pe o problemi ) del pe o pučiba , ko trubul te arakhel ginekologo an i Šutka thaj ko si došalo e problemenge so arakhen pe o džuvlja tari Šutka.
Si li o Todorov šerutno bašo bilovengere kontrole, kote ko than akala romane džuvlja tari akaja komuna , džana ko Čairi pukjinen 600 denaria trujal so i kontrola kerel o matično doktori?. Si li oleskiri savala te kerel pe renoviriba e ambulatake an i Šutka so si but ko bilačho hali. Ka kerel li reakcia o ministeri kote salde 5,6% taro khamne romane džuvlja ko persi berš sine vizitkerime taro patronažno medicinakoro personali? Prekal o havlajrde akcie sa o khamne džuvlja valjani sine te oven vizitkerde duj droma ko berš. Si li o fakti kaj i Šuto Orizari komuna kote si majbaro procenti Roma thaj odoleske nane interes . Jali o nevo ginekologo akana garavel pe thaj ka ovel čhivdo ko masek april, kana ka oven o alusariba, thaj sar paketi ka avel e romane džuvlenge te šaj te resen politikane punktia ki odoja opcia taro ministeri Todorov?
O teksti si lendo taro CIVIL : http://civil.org.mk/do-koga-romkit-od-schutka-tchkaat-na-ginkolog/?lang=mk
