O 29 beršengoro Almir Ismaili taro Skopje , si terno romano čhavo so ko agorutno periodo sine pendžardo e auditoriumoske ple lejbaja than an o pendžardo muzikakoro realno šou "Na ista adresa". Palo avgo prezentiripa akale šouske sine presia kote o Almiri ka ovel jekh taro šerutne favoritia akale šouoske. Numa taro desave karane o organizatori čhinavgja akava šou, thaj o baro talenti (majanglal muzikakoro thaj vokalno), ačhilo na prezentirime dži ko agor o Almiri.
O Almiri si romano čhavo taro Lisiče thaj pendžardo si buvle publikake prekal lendo than an o pendžarutne regionalno muzikakere đoua sar so si M2, X Faktor thaj aver.
Oleskere prezentacie sine karakteristično thaj šukare thaj dikhibaja oleskoro agjaar vakerdo "harlemsko vokali" sine angažirime sar dujto vokali tari rig pendžarde muzikakere anava thaj snimiba gilja pendžarde čerenjencar sar so si Ermal Fejzulahu taro Kosovo, i srpsko čeren Marija Šerifović, Lambe Alabakoski thaj aver.
Valjani te džanel pe kote plo starti ko asavke talent šou o Almiri kergja le ki romani TV BTR-Nacional thaj ko olengoro teganutno muzikakoro šou "Neve čerenja"
Valjani te akcentirinel pe kote o akana čhinavdo šou "Na ista adresa", sine manglo taro žiri thaj o organizatoria thaj sine majbaro favoriti te lel o šerutno phursako, snimibe sasto album thaj video spotia. Numa sebepi so sine čhinavdo o šou, o ačhile 6 finalistia sar aver phursako thaj alternativa si te sniminen po jekh gili ko studio taro Robert Bilbilov.
O Almiri kerel buti an i jekh kompania an o Skopje, so kerel buti sar tehničko teloikeriba jekhe antivirus programa pendžardi anavea sar Bitdefender. Ov ikerle koordinacia bašo Germania, Švajcaria thaj Austria.
Ple avutne plania o Almiri dikhel len an i muzika, thaj ka kerel sa jekh dive o Almiri te ovel pendžardo buvleste sar giljavutno so ka ovel le so te del ple fanenge.
Almir dža salde anglal!
