Deš gilja taro thagar e romane giljake , maškar so thaj o gilja “Djelo, djelo”, “Koj si gola Roma” thaj “Akaja rat”, si ko albumi tari amerikansko giljavutni Eva Salina, kote palo 20 berš buti balkansko muzikaja kergja tributi e Šaban Bajramovičeske. Ko albumi “Lema, Lema” si sikaviba respekti premal o mulo niško romano giljavutno, so si ikavdo angleder nesave masekoja, i 32 beršengiri Eva kombiniringja i tradicia moderno tonencar thaj ko romano melosi "čhivgja" miksi taro pop, rock thaj jazz improvizacie thaj premal olakere lafia, oj džanel kaj olakoro krlo thaj o krlo taro Šaban Bajramović si but diferentno, thaj odoleske oj giljavgja olen ko plo stili.
Oj manglja o gilja taro Šaban Bajramović sebepi i romani čhib so isi len zoralo mesaži, thaj sikavel animacia taro komplikuvano situacia an o dživdipa. Olake sar giljavutni isi la tenzija maškar i muzika thaj o tekstia e giljake.
Oj akcentirinel kaj akava tributi bašo Šaban Bajramović si but javer forma, thaj kote i "kombinacia" thaj oj respektirinela i tradicia.
-Mli idea si i balkansko muzika , i romani gili thaj o Šaban Bajramović te aven popaše buteder manušenge so nikana na sine len kontakti asavke muzikaja. Na mangav te vakeren kote ko momenti kana ka šunen i muzika kaj si odova nesavo folklori jali etno - proekti, numa valjani salde te šunen i muzika - akcentiringja i Eva Salina.
Link:
