An o trintodi (3 april) an o 12,30 o saati ka ovel puterdo artikano vizuelno performansi "Memo Sulejmanov - makedonikano ateltsko rekorderi".
Ka oven prezentirime muzejsko eksponatia so formiringje o fondi taro Memo Sulejmanov an o Historikano ofiso e Muzeoske tari Makedonia taro khedime artefaktia taro Fizičko kultura thaj sporti.
O Memo Sulejmanov si biame an o Veles an o 1926 berš.
Trujal so na pendžarenan le buteder buvleste numero sportistia thaj manuša majbut tari i amjterni generacia , o Memo Sulejmanov si fundamento e maratonsko prastajbaske an i Makedonia. Ko berša palo o dujto lumiakoro mariba, o Sulejmanov sine aktivno an o discipline maškarutne thaj lungo atletsko droma. Sar lungodromengoro atletičari sine rekorderi ko sa ajaka discipline taro 3000 m dži ko maratoni.
Ko Nacionalno individualno šampionati an i Jugoslavia so ikergja pe an o 23 thaj 24 avgust 1946 berš , o Memo Sulejmanov reslja ko 2 than rezultatea 2:47. O korkoro plasmano an o akava maratoni sikavela o kvaliteti na salde an i Makedonia numa saste an i teganutni Jugoslavia.
An o 1949 berš tari rig e teganutne avgo sportsko gazetake an i Makedonia "Sportski glas" sine kerdo alusar bašo majšukar sportisto an i Makedonia . An i kerdi anketa maškar o drabarutne , maškar o majđukar 10 sportistia o Memo Sulejmanov reslja an o 7 than.
O Memo Sulejmanov ka ačhol an i memoria sar ateltičari so prastala sine pernango bizo sprinterke . Palo agor oleskere lungo thaj barvali sportsko kariera, ko sa o majimportantno sportsko manifestacie avela sine an i rolja sar fotoreporteri. Savore kamena sine te oven fotografirime baš olestar.
O Memo Sulejmanov sebepi so sine Rom thaj oleskiri kali morthik maškar o sportistia sine popularno teloanavea sar "Afrikanco" , An o internacionalno atlestko mitingo an o Beograd ko stadioni JNA, an o 1949 berš, sine udžardo bare ovaciencar thaj aplauzi tari publika soske ola gndine nb sine kaj atletićari so avilo tari Afrika.
O Memo Sulejmanov mulo an o 1984 berš an o Skopje.
