O Jasmin Ramić popendžardo sar „Lioneskoro ilo“ si membro ko Kik boks klubi „Panter“ tari Bjelina ki BiH. Pire garvasialipaja em baripaja em perfektno tehnika akava terno Rom tari Bjelina lelja o ile tari publika.
Trujal so o klubi „Panter“na istemalkeren o budžetsko love tari diz Bjelina em funkcionirinen bizo sponzoria, o klubi kerel but baši i kariera akale talentirime boksereske.
Trujal I kariera taro Jasmin ole sine le mečia diferentno rivalencar ko diferentno kategorie em trujal o amatersko boksi ov marel pe sine em ko prifi mečia taro K-1.
Ov vakerel kaj o kik boksi irangja oleskoro dživdipa em sine le phare momentoa em gind te mukhel o boksi.
Trujal so sine le laćhe rezultatia našti sine te egzistirinel taro akava sporti. Počmingja te kerel buti ko agrari em ko odola momentia gindinel sine kaj odova si majšukar opcia.
Palo trinberšengiri pauza palo o lafikeriba oleskere trenerea Dimitar Jovanović – Rox palem khuvela ko ring em palem boksirinel. O treningoa džana sine pohari em ko avgo turniri reslja o avgo than kote than lele em but aver seriozno borcia.
Ov sikavgja kaj isi le čače romano ilo. Ov vakergja kaj e rivalen na alusarel , savoren respektirinel em ko mečia džala dži ko agor. Faktea so isi akana o šartia ov vakerel kaj si but čalo.
Sar mesažo dži ko terne Roma o Jasmin vakerel kaj prioriteti si i edukacia , soske ov na educiringja pe.
Dujto buti si te sportujnen o Roma em si but talentirano nacia.
