Ola trubul e familiake Muhadinovi tari Bitola kote angleder duj berša na resle te džan an i Švajcaria ki vizita paše familiake agorkjergja kriseskere deciziaja thaj i Makedonsko policia trubul te pukjinel 60.000 denaria (1000 eura), sar globa.
O Rom thaj i romni Muhadinovi angleder duj beršana nakhle i makedonikani simantra soske i makedonsko policia "kergja rasno profiliriba e dizutnenge so si prepereutne tari romani jekhin thaj na mukhlja olen te džan majodorig pe dromea".
O Roma sine anglal o krisi thaj sar avukatia sine o Makedonikano khedipa taro terne jurisdiktia teloikerde taro Europakoro centari bašo niamia e Romenge.
*I familia Muhadinovi sine jekhutne dromarutne an o busi kote trujal o pasportia sine lendar rodime thaj dopherde dokumentia. O rom thaj i romni sine le sa o dokumentia, bileti ko duj riga, garantno lil thaj 2.000 eura keš. Numa na mukhle olen te ikljon avrial tari them thaj o busi gelo majodorig bizo olende.*
" Asavke storie isi but kote si irame o Roma. Odova si salde soske si Roma. O kriso akale čipotake arakhlja kaj o rom thaj i romni sine viktimia tari rasno diskriminacia thaj aso o ustavi o garantirimo niami taro tromalo dromaripa thaj ikljojbe tari them na sine lenge mukhlo" vakeren tari organizacia
O fundavno kriso an i Bitola dengja decizia kaj o Ministeriumi andrune bukjengje tari RM trubul te pukjinel po 30.000 denaria ko dženo. Ud‚arela pe kaj o ministeriumi te anel iramo antvorto.
"Lačhe si so si andi i decizia taro Fundavno Kriso an i Bitola, so kerel i pozitivno praktika taro Fundavno kriso Skopje 2, thaj i Apelacia taro Skopje. Akaja si dujto čipota so si teloikerdo taro Makedonikani unia e terne advokatenge kote o kriso zojrakergja i diskriminacia thaj teleperavipa e niameske jekh a jekh tretmani upral i funda, etnikano preperipa. I decizia si importantno soske d‚i akana o tromalipa ko phiripa e romane populaciake, thaj i sistemsko diskriminacia an i R.Makedonia si aktuelno ko agorutne 4 berša" vakergja i Jasna Orovčanec Aranđelovič, proekt menadžeri an o MZMP.
