Bari policiakiri akcia kote than lele paše 1.200 policajcia so sine kerdi ko javinakere saatia an o 7 Maj 2019 ko 19 lokacie trujal sasti Belgia a legardi mujal i Romani jekhin (Travellsia).
O kriseskoro akti so sine implementirime an i akaja kacia si sebepi nalegalno biznisi vordonencar.
O IRU učeste respektirinel i buti e policiakoro thaj o akcie mujal o kriminalcora an i Belgia, soske trubul te oven savore jekh a jekh anglal e belgiakoro sasoitnipa thaj jurisdikciakoro sistemo.
Numa okova so si motivo baši reakcia si i forma so si implementirimi an i akcia taro akala masovno phanlipa. E policiakiri akcia sine kerdi an o 200 aktia , phanle paše 80 Roma thaj konfiksujme karavania, khera, vordona thaj love.
Ko jekh an o vakti e akciake majbaro kotor taro o Roma pali akcia thaj ande an o policiakere stasionia palo tikno vakti sine mukhle bizo te oven pučle, thaj bizo te vakeren soske si mukhle , numa o lende artikloa thaj karavania nen lenge dende napalal, thaj akana baro numero Roma si pe droma bizo nisave love thaj khera. Ko jekh nane lenge kerdo faisali sar alternativno elementi te šaj ola iranen pe an o pire khera.
Odova sikavel kaj o astariba nadošale manušen bizo fakti kerde kriminaloske si naadekvatno an o kriseskoro sistemo.
Asavki forma reakciake džangavela i kali historia ko vakti taro masovno phanlipa thaj deportacia an o konc logoria ko vakti taro Holokausto.
Panda majbuteder si nalačhe fakti so sa akava si kerdo anglal o jakha an o centro e Europake an i Belgia! A i Europa trainela, phanel pe jakha thaj na kerel nisavi reakcia.
Si li asavke formaja akcie mujal o Roma so si salde "kolateralno ziano" an o anava akana parlamentarno alusarin an i Europa te šaj vazdel pe o rejtingo thaj i kampanja sa okola kandidatia deputatonge taro nacionalistikane partie so so orientirime pire anti romane retorikaja.
Odoleske o IRU na trubul te nakhavel akava fakti thaj kerel reakcia dji ko sa europakere thaj aver internacionalno institucie thaj organizacie.
Ko jekh o IRU akharelasa e belgiakere institucien thaj o ministeriumo bašo andrune bukja te kerel o zarurutne aktivitetoa te irane e Romenge naplala olengere karavania, thana kote so dživdinena.
Rodela pe stopiriba - čhinavipa e phalipaja e saste romane jekhinake bašo kerdo kriminalo taro desave individue. O IRU akharela sa e organizacien manušikane niamenge te den amenge suporto te arakhen pe forme te šaj faisalkerel pe akava baro problemi thaj te kerel pe konstruktivno dialogo e belgiakerethaj internacionalno instituciencar.
Ko jekh o IRU bichavela jekh apel dji ko sa Romane lokalno thaj internacionalno organizacie, ma te istemalkeren akaja bilachi situacia te manipulorinen upral o dumo ki bibaht akale Romenege salde baso pire individualno thaj personalno intereso jali profito.
