An o kukro an o 5 Maj an i them ka ikerel pe i dujto rota taro presidenteskere alusariba baši funkcia šefi e themake. Ka ovel alusariba maškar o duj kandidatia i Gordana Siljanovska Davkova kandidati taro VMRO DPMNE thaj olakiri koalicia thaj o Stevo Pendarovski kandidati taro SDSM thaj olakere koaliciono partneria. Ko jekh interesno e dizutnenge ko pučiba kobor si barvale o kandidatia akale funkciake? Save imotoa khuven i Siljanovska thaj o Pendarobski an i presidenteskiri trka thaj so ka mukhel palal lende o avutno presidento e themake kana an o 12 maj ka khuven an i presidenteskiri palata an o Vodno. O duj da kandidatia si len skromno personalno imoti. E presidenteskoro kandidati taro SDSM o Stevo Pendarovski dživdinela an i skopsko mahala Aerodrom ko kher taro 62 m2. Manušikane vakerdo ov si domazeto soske o kher si an o anava taro oleskoro sastro thaj odoleske odova nane akcentirime an o anketno lista anglal i komisia baši antikorupcia. Ko anav taro Pendarovski isi vordon Jugo taro 1999 berš šparime love an i banka taro 12.000 eura, so si leske mukhle sar ko testamenti. Oleskiri romni si la vordon Reno Megan thaj šparime an i banka 3.000 eura. I Gordana Siljanovska Davkova ola pa nane la kher ko olakoro anav. Oj dživdinela an o centro e Skopjeske ko drom Orce Nikolov an o familiarno kher so si an o anav taro olakoro rom. O kher si baro 114 m2 thaj si purano kher. E Siljanovska nane la vordon. Nane la ni vordoneskoro sertifikato - vozačko dozvola thaj na kamel te paldel vordon. Olakoro rom si penzionirimo jurisdikti , si le Honda Šatl taro 1996 berš. Sebepi so i Siljanovska nane la nacionalno funkcia nane la ni obligacia te registririnel piro imoto anglal i Komisia baši antikorupcia. Odoleske nane plano kobor lover si la an o bankarsko konto. Numa tari olakiri familia vakerena kaj nane la baro špariba an i banka. Numa avere rigatar nane la ni kreditia jali aver borčia.
