O phralja Rumen thaj o Vasko Karagozovi thaj o Isus Atanasov sine ande anglal o Kriso an o Plovdiv kote o krisaria ko momenti dikhen o fakti trubul li te oven ola phanle jali mukhle. O Obvinitelia rodena e trin e terne manušenge majpharo pritvor ko udžariba dži ko krisiba , hramosarela o "Trafficnews.bg". Olen si len nekobor krisoskere aktia a duj olendat aso o kanoni šaj te oven phanle. Kerel pe lafi kaj ola odothe tane soske margje policajco kana sine an i butio thaj phagle policiakoro vordon sar akti huliganstvo. O advokati e ternengoro Karagjozovi trubul te roden pe o faktia e incidenteske an o Kuklen kote aso o klientia odova sine inicirime taro o policajcia. Aso i teza advokaturake o policajcia kergje buti nakanonikane. "Soske avilo dži odova?" odova si o majimportantno pučiba. te dikhel pe soske sine akharde o Policajcia? odova si but diskutabilno. Aso o lafia e phralengoro ola nane inicijatoria a "o policajcioa sine an o odova pašiba", vakerel o advokati. Trujal odova o trin džene vakerena kaj sine terorizirime thaj telal tortura ko agorutne 3 divesa kana sine an o pritvor. Ola nakhle 72 časia ko pritvor , panda aver duj e dženencar so palo odova sine mukhel erati. Ola došakeren kaj i policia margja len akana sine phanle olengere vasta thaj ližonen sine o pani taro daske a sine but trušale. I paše familia taro terne Roma sine paldime tari sala soske keren sine vika. O Kriso rodela phanlipa olenge soske šaj te keren aver bibahtalipa thaj o trin džene sine but arogantno. E themakoro obvinitelstvo vakerel kaj ola khuvgje ko kher tari familia Šalamanovi thaj sikavgje bari agresia mujal o policajcia.
