O načalniko e thaneske Senetjea - Csenyétea, tikno gav an i Ungaria. O Ištvan Kiss, vakerel kaj jekh Romani džuvli muli o nakhlo kurko , soske o šoferi e medicinsko vordoneske na manglja te khuvel ko gav bizo policiakiri protektiva.
O Kiss akava notiringja le sar diskriminacia , a prekal o mediumia bičhavgja mesažo kaj ka vazdel kriseskoro akti mujal akava. Panda majbari kontraverznost si kaj o mediumia so si paše e ultranacionalistonge istemalkeribaja akaja tragedia sar fakti kaj ki Ungaria isi thana so trubul ma te džal pe olende.
O načalniko Kiss prekal video mesažu ko Facebook vakergja kaj ko mismereskere saatia sine informirime taro jekh gavutno našavgja i svest em na del nišani dživdipaske. Aso oleskere lafia ov reagiringja majsiga kana pire komšia legargja le dži ko vordon e medicinsko arakake kote o šoferi sine ko khujbe e gaveske em na manglja te avel dži ko kher bizi policia, Bibahtake o dživdipa akale nasvaleske našti sine te kerel pe khanči.
Ko kontradiktorno informacia tari Nacionalno ofiso e ekipake tari medicnsko ofiso vakerena kaj trubula sine policiakiri opservacia , soske sine len telefonsko akharina kote bičhavde daravina . Ki vakerin ko telefonsko numero 444 o ofiso demantirinel kaj kergje diskriminacia , soske vakeren kaj olengiri „fundavutni profesia si jekh a jekh dejba medicinsko suporto sakoneske so šaj majšukar te kerel pe i buti kaske so trubul.
O načalniko pakjala kaj kerel pe lafi baši diskriminacia soske sar so vakerel o uče institucie vakeren e bukjarnenge ma te džan ko romane mahale bizi policia.
„Akava nane te bistro , ka roda o čačipa anglal o Kriso . Akaleske nane bangipa ko medicinakoro personali numa ko olengere uče šefia soske ola vakeren lenge kaj na troman te aven ko romane mahale bizi policia “ akcentirinela o Kiss.
Taro ERRC (Europiean Roma Right Center), havela pe kaj si dendo notacia taro jekh pediatro tari diz Arlo kote vakerena:
„Kana akharen urgentno medicinakiri ekipa ola si but arogantno. Iskreno ni kamav te kerav lafi olencar. Ola akharena medicinakiri ekipa a nane zaruripa odoleske. Ka khujnel khere, na mangen te džn ko doktori em akaharena doktore khere. Soske isi len 5 čhaved khere. Olenge polokheste te avel doktori lenge khere ko than te džan ko doktori”
Nesave doktoria ko pučiba taro ERRC vakergje kaj džanen desave pire kolegen so but droma na kergje reakcia ko akharina taro Roma, soske na pakjana kaj si urgentno akteske.
Sa akava vakerel kaj buvleste regionalno čhinavel pe i urgentno medicinakiri asistencia e Romenge ko desave mahale. , a o načalniko taro akava gav vakerel kaj akava nane avgo drom sar incidenti . Angleder jekh berš čhavo romano tarp 5 berša mulo ko asavke forme na deiba suporto taro medicinsko ofisoa.
