Sebepi o akana sig kerdo incidenti maškar o JSP kontroloria em o student Sirhan Usein , sar reakcia taro buteder romane aktivistoa em dizutne em o bičalipa taro notirime globe mujal o kontroloria ko JSP thaj ko jekh o demanti kaj nane lafi baši diskriminacia , grupa romane aktivistoa em dizutne angje decizia em havljargje protesto anglal o JSP bašo štartodi ko 13.02. ko 16 o časo.
Ki vaktavin em i havljarin e protestoske maškar o aver si notirime: „ Panda kobor studentia, terne, phure em avera ka oven daravde , teleperavde em diskriminirime sebepi o natolerantno reakcia taro o kontroloria ko JSP?
Doasta si diskriminacia, dosta si siledžie , dosta si seksualno natolerancia em atakia, em dosta si limitirime dživdipa. O institucie sako drom distancirinen pe tari diskriminacia, thaj olate nane, a o dizutne vakeren kaj ola si sako dive diskriminirime.
Dosta si! Aven amencar ko akava protesto avdive o Sirhani si viktimi, tajsa šaj ovea tu ako na ikljiovaja avdive. Ajde te sikava e JSP-eske kaj e natoleranciake em I dar nane than pobuter ki akaja them.
Prekal akava protesti rodaja:
1. Rodaja te mukhen pe tari buti akala duj kontroloria so kergje atako upral o Sirhan Usein
2. Bajaradi andruni kontrola so ka regulirinel pe
3. Rodaja te čhiven pe ki buti Roma kontroloria” – vakerel pe ki vaktavin.