O romano deputati thaj presidenti ko Sojuzi e Romengoro tari Makedonia o Amdi Bajram (63), akala divesa nakhavel len khere em sasljarel pe pali kerdi amputacia taro piro, Ov vakerel kaj I operacia sine kerdi angleder 15 divesa em akana si but šukare.
-O dijabetis kergja piro sine mange amputirime o piro dži jekvaš. Akana sium šukare em sium khere. Mli familia si trujal mande em mage si lačhe so sium olencar.
Na džanaja so anel o dživdipa soske vakeren kaj o sastipa sako drom si ko avgo than . Numa me sium but ambiciozno manuš em nane te ačhovav akate. Kana ka rehabilitirinav man em ka čhivav mange protetika. Džanav kaj nane te ovel lokheste , ka sikljovav palem te šaj phirava e protezaja, em taro sa vakti sium sine optimisti. Ka tergjovav ko mle pire palem , em neve takateja ka iranav man ki politika. Me ačhovav president ko Sojuzi e Romengoro, mlo than si odothe” , vakerell o deputati.
Ov dopherela kaj o optimizmi nikana na mukkhlja ole em pakjala kaj sa palem ka ovel šukare.
Psihički na peljum ni ko jekh momenti. Ikerava man , o pozitiviteto si mande sar karakteri. Isi but aver pobilačhe bukja ko dživdipa agjaar dikhava ko bukja em maksimalno legarava man te šaj sasljovav majsiga em te iranav man ko purano forma dživdipaske.
I medicina džala angle isi modern proteze em nane te ovel problem te šaj ačhovav kop ire. Me sium lošalo em odoleske bičhavava savorenge bari šukrikerin (zahvalnost) sare okola so mangle mange so posiga te sasljovav , vakergja o Amdi Bajram.
Jekhutne džanela pe kaj te kergje pe neve alusaribaskere liste bašo Parlamentarno alusaribam tegani o Amdi Bajram ka ovel ki uči pozicia em odova majsigurno ko IE 2.
