Prekal o notacie taro IRU membro ki Ungaria i Diana Goman, ko gav Pusza Henszce so si ko utar paščimalo kotor tari Ungaria em isi le paše 1.300 dizutne, ko odova gav isi em tari Romani jekhin.
Ko gav isi jekh lokalno drumo kote odothar nakhena em o Roma, numa premal olengere notaciue akala divesa odova drom si randlo saste. Odova premal olende si kerdo manginaja te šaj e Romane jekhina hulaven la taro aver kotor e gaveske.
Sar ola akceptirinen odova kergje le o aver gavutne sebepi i dar taro COVID 19 em agjaar mangle te distancirinen pe taro Roma ma te inficirinen pe.
Aver rigatar akava akti premal o Roma taro akava gav sikavel kaj korkoro o Ungarcia mangen te keren etnikane tenzie , sikaven kaj na mangena e Romen em nane tolerantno so si Roma ko olengoro gav.
Savi reakcia ka kerel akana i komuna akale akteske panda si napendžardo , em ka lel li neko akava džovaplipa bašo kerdo akti. Fakti si kaj akava lokalno drumo si jekhutno drumo kote so šaj džana em vordona , maškar so em medicinsko vordona so valjani bizi barikada te nakhen ko vakti tari akaja pandemia. Odolea čhinavde si em o drom kotar valjani te nakhen em vordona taro mujaljagakere ekipe em avera vordona.