O Nenad Pajić taro Mladenovac em vakergja kaj oleskiri familia ko dujto di ko 12 Maj sine čhivde ki čhingar em akušiba ki nacionalno funda taro duj olenge napendžarde terne manuša.
Ki avlin anglal olengiri zgrada avile duj terne napendžarde manuša paše 30 berša kote majanglal kergje atako upral olengiri phuri komšika.
-Ačhile anglal amari zgrada em počminge te vikinen „Cigani, Cigani „ em vakeren sine builačhe lafia. Počmingje te khuven olakere rikone em kana pučlja len i phuri soske odova kerena ola vakergje: „Tumende e Romen valjani sa te mudaren, tumen sien lošno“
Ko odova momenti o Nenad zamolingja e terne manušen ma te keren odova ama oleske da vakergje kaj sa e Romen valjani te mudaren. Ola mangle te khuven le.
Ko odova momenti mi daj em mi phen čhinavgje pobaro incidenti, soske e Nenade isi le nasvalipa ko ilo, epilepsia, učo pritisok em ciste ki godi. Šaj sine but lokheste te khuvgje le te ovel odova fatalno oleskere dživdipaske.
- Čače sine bezobrazno em akošen sine kote jekh olandar vakergja kaj sebepi amen e Romendar em taro president o Vučić sine ko phanlipa 7 berša, vakergja o Nenad.
Palo odova oleskiri daj i Daniela čojral akhargja policia, oj sigate reslja em e duj ternen phanle len.