Ko konteksti e akte “George Flojd” , I NGO ROMEA liparela kaj asavko akti sine mudaripa e Romeske Miroslav Demetar taro Šatec, Čehia so angleder štar berša, tegani sar 27 beršengoro mulo ko 18 oktomvri 2016 berš ki piceria “Panamera” kana sine le konflikto e klientelaja, so alo dži ki intervencia tari lokalno policia.
Sar ko akti taro Flojd isi video materiali kote nekobor persone maškar so em jekh lokalno policajco ki patrol, marela ćučkindo upral o Demetar. Jekh taro misafiria khuvel e Demetar, ko vakti kana ov sine pašljardo tele em phanlo ko vasta.
Ki odova video materiali o terno Rom majanglal del sine vika , a palo odova traingja em na mrdinel sine pobuter. Sine akhardi medicinsko arka ki piceria kergje leske reanimacia ama na reslje te reanimirinen le.
Ko fevruari 2017 berš I policia phanlja o akti vakeribaja kaj ov sine drogirime em odoleske muloo Demetar, a na so sine mardo. O Ombdusmano ki Loni notiringja akava akti em vakergja kaj I policia nane la doš.
I familia taro terno Rom na akceptiringja e policiakoro raporto , em korkoro dikhindo o video materiali em primal o svedokia odole akteske so sine ko momenti ki piceria ola dengje sar žalba dži ko Regionalno ombdusmano.
Numa em o regionalno ombdusmano akceptiringja o dendo akti taro anglutno ombdusmano em o akti so kergja I policia, so sikavgja kaj ni jekh dži akana na lelja o došalipa em na sine andi globa akale akteske so mulo o terno Rom.