“Akale romanea mangljum te sikavav kaj sa šaj , kana valjani te kere maripa. O mukhle čhave sebepi o nane takati te trampinen khanči , peren ko ambiso taro autodestrukcia , proprokia em devijacia. Havav len , me sium sine sar odola čhave em sako drom ka ovav, vakerel o Meti Kamberi autori e romaneske “ I diz e dukhakiri”
Ov sar čhavo dži ko 12 beršpa ni džanel sine te drabarel em hramosarel. O Meti ko ple 19 berš reslja te kerel piro avgo lil.
Biame si ko Niš ki Romani mahala. O majtikne liparia del pe godi ko tikno kher kote dživdinel sine pire dajaj em phralencar, o droma kote so mangel sine devlenge , soske bizo love na tromal sine te avel pe ske khere.
Ov ko plo čhavoripa so šaj li te vakerel pe kaj sine čhavoripa. Na del pe godi kaj sine le desavi mangli igračka, em jekhutne so del pe godi si i bokh , i dar em o maltretiriba em o dukha.
Angleder te ovel legardo ko Ofiso bašo čhave pe droma nekobor beša sine dendo ki familia so arakhenčhaven. Vakerel kaj na sine bahtalo ki odoja familia em na angja leske khanči lačho odola berša taro čhavoripa ki odoja familia.
“ Sar nakhel sine o vakti agjaar me da angleder šukrikeribaja dži ki mli pedagoška em socialno bukjarni Emilia taro o Ofiso mukhle čhavenge , majangleder phravgja mi goditaro desave bukja so na pendžarav len sine. Oj sikavgja man te hramosarav em drabarav. O romani “Diz e dukhakoro” so autobiografsko, o persone si realno a o anava fiktivno.
„Motivacia e romaneske na valjani sine mange te rodav . 18 berša legarav la ki mand, legarav la panda em ka legarav la majodoriga“ vakerel savo si oleskoro romani em dopherela: „ Akale romanea mangljum te sikavav kaj šaj sa te resel pe te manglja manuš, em valjani te marel pe manuš sako drom.„
Sebepi so phergja piro suno so mangel sine panda sar čhavoro te hramosarel romani, o Meti isi le nevi mangin te džal em te agorkerel fakulteti em te ovel socialno bukjarno. Mangel piro dživdipe em aktiviteto te kerel buti čhavencar taro socialno riziko.
