Prekal o informacie taro desave mediumia o kurko so avela ka havljarel pe putardi vaktavin baši buti e Albanconge ki administracia vakeren partisko hainga taro o DUI.
O konkursi so si hazri valjani ki buti ki administracia te khuven 800 džene kotar so 640 si Albancia, a o resto 160 si taro avera etnikane minjoritetoa.Džanlipaja i džiakanutni praktika taro khujbe ki buti ki adminsitarcia kote o Roma prekal i statistika taro 2002 berš si paše 2.6% a o bukajrnipa ki administracia si majtele taro 1% udžarel pe majoptimistikane te khuven ki buti maksimum 10 Roma em odova valjani te utsavalkerel pe bare ognometea.
Te sine primal okoja “Prekal I javin pendžarel pe o dive” em primal okova so o Roma lele ki akanutni koalicia (drabar: uče legarutne pozicie kiko parlamento em govermento ) čače ka ovel bari „Loto premia“ te khuvgje ki buti ki administracia deš Roma .
Akava si i realno refleksia taro džanlipa e romane partiengoro save pozicie rodena tari akaja koalicia ko interes e Romane jekhinake ki them.
Te sine angleder čače gužva em reakcie tari aver nacionalitetoa em okoja stanbdard retorika „Kalimero nane pravda“ kana si ko pučiba i albansko rig ki them akana o vaktia si irame em javer čhane em akana ko Kalimero nane pobuter nane pravda, numa ov si promotori ko sao o politike ki them. Bravo be Kalimero. Akana na sian salde kali pilička parne lušpaja taro jaro ko šero. Akana sian Gospodini manuš!
A amen o Roma? Kaj siem amen? Siem sine em ačhilem palem o kalo bakhro taro crtano filmi ko Pink Panter. Notirime, bidikhle em čajljola sine hari čar hajbaske. Em agjaar savakteske. Jali okoja manušengiri purani vakerin Dži kote jek hala mas, a aver salde armin – o proseko si sarma! A odova si lačho proseko! Amenge e Romene si okoja vakerin „Ajde manušalen te hab armin bizo mas! Trubul o vogji te kerel buti, a so ka kerel nane importantno. Ajde terin i buti!
