O lokalno alusariba akana sig ikergje pe ki Bosna thaj Hercegovina . O dizutne alusargje lokalno legaripa ko 142 lokalno jekhina -120 komunakere em 22 dizja, barabutne 5.800 alusaribaskere thana . Alusarde si dizjakere šerutne e dizjenge em komune, representoa ko dizjakere em komunakere konsiloa em representoa ko parlamento e dizjake Brčko.
Detalno analiza kerdi taro Asociacia terne Romane džuvljake „AKSIOM“vakerel kaj ko liste sine 20 Romane džuvlja kandidatoa em 42 Roma so na sine asavko numero ko anglutne alusariba. Trujal o baro numero kandidatia , salde šov Roma resle te khuven sar konsiliaria ko komunakere konsiloa. Okova so sine skldibaske sine so ni jekh Romani džuvli na reslja te khuven ko Konsiloa , trujal so ko anglutne alusariba sine Romane reprezentoa ko Konsiloa.
I aktivistka bašo džuvljane niamia I Jadranka Miličevič dengja komentaria bašo nakhle alusariba em notiringja len sar but melale alusariba em I kriza Kovidea istemalkerel pe ko vakti taro alusariba.
-Isi man informacie kaj o korkoro kandidatia sine teleperavde , narespektirime sar džuvlja ko pervazia taro olengere politikane partie. Te irangja pe pobari sama ko Romane džuvlja na sine kerdo ki čačutni forma em o politikane partie na kergje buti ko olengoro progresi sar kandidatia em persone so si importantno e lokalno jekhinake. A kamav te vakerav e Romane džuvljake gindinav kaj na sine len jekh a jekh akcepcia sar kandidatia em ko mediumia jali ko vakti taro o kerde kampanje – vakerel I Miličević.
