O eurodeputato Josef Sajer vakergja kaj sine “ki privat party” em oleskoro “feleri” sine “salde leskoro”. Molinava savoren ma te akceptirinen mire thema jali miri politikani partia, nakerel ov. O Sajer dengja ostavka tari partija FIDES ki Ungaria em tari funkcia eurodeputati.
O kriso vakerel kaj desavo manuš notiringja dži ki policia kaj dikhlja manuše so našel prekal oluko. „O vasta e manušeskere sine ratvarde . Šaj khuvgja pe kana našela sine. Ko oleskoro ranco I policia arakhlja em narkotikia” vakerel pe taro kriso. „O manuš na dengja nisave dokumentia . Ov sine legardo dži ko leskoro than dživdipaske , kote diplomatsko pasportoa identifikujngja pe sar S.J. (1961)“. Sa okola so sine ki odoja party resle globe soske phangle o kanoni. O Kriso ko Brisel sine informirime e incidenteske em angja decizia te mukhel sa e protagoniston bizi aver došperavibaskoro akti. O Sajer ki pli vakerin vakerel kaj I policia dengja le “ oficialno verbalno notacia em irangja le khere . Ov vakerel kaj na sine drogirime em vakergja kaj leske but “žal” em kaj “but si pišmani” so na respektiringje o dende preporake baši koronavirusi. “Odova sine but bilčahe tari miri rig . Hazri sium te lav p džovaplipa em I globa tari miri rig” vakergja ov. O Sajer em nekobor aver diplomatoa sine astarde tari policia ko “orgie”ko bari ko centro taro Brisel , em o lokalno mediumia vakergje kaj o deputati manglja te našel tari pendžerka. Ki Belgia nane mukhle te kheden pe pobuter taro štar džene em ando si policisko časui te đaj ma te buvljarel pe o Covid 19.
Ko si o Sajer?
O Sajer si jekh taro majpaše manuša e hungariakere premiereske Orban . Sine membro ko konsilo so kergje o nevo Ustavi e themakoro taro 2012 berš kote rodela sine protektiva e “hristiansko moldipaske” em definiriba e prandinake sar jekhin maškar murš thaj džuvli.
Ko agor taro 90-to berša studiringja ko Oxford sar stipendisti tari i organizacia George Soros, kote akana barabutne e Orbanea šubikerel le kaj randel o trandicionalno moldipa taro ungariakoro sasoitnipa.
