Dživdinaja telal o kham taro bizarno e edukaciakere metodia. Panda sar čhave educirinen pe kaj te na sien sine madro ka avel i Romni te čorle tut ili ka lel tut o Roma so kinena puranipa.
Odova sikavgja amen amari nasvali edukaciakiri funda, so isi amende. A 21 veko siem!
Truja odola bare egzamploa isi ake panda jekh akana sig kerdo. Sar so džanaja savore te šaj kerel pe panda majbari kataklizmičko hoš so si zorali o regioni tari centralno kroacia angleder o nevo berš sine astardo bare phuvjakere tinanibaja. E phuvjakere tinaniba ko regonia tari Bania kergja bare materijalno zijania.But manuša ačhile bizo ple khera, aver sine pšeravde em i dar em panika astargje i dizjak Petrinje em Sisak.
I katastrofa so uli akale manušencar kergja pherdo manuša tari sasti Kroacia te den suporto. Angleder te keren reakcia o themakere institucie ko Petriunje em Sisak sine volonteria so angje lenge saste fundavutne artiklia dživdipaske em dengje suporto ko užariba e kherenge . Mašpkar akava haosi neko dikhlja kaj valjani da upreder sa te sikavel informacie ko socialno netvorko (FB, Twitter..) kaj desavi grupa Roma ale ko akala thana em džanlipaja I haotično sistuacia te čoren desave khera e manušenge taro odova regioni. Ko satrti taro akala informacie vakergje kaj na kerel pe lafi bašo desavo nacionalizmi. Ten a sine akava nacionalizmi nane pendžardo soske odola so dengje akala informacie hramosargje čak I nacionalnost kaj ola si Roma?
A čačipaske odoja grupa si salde grupa taro 3-4 romane familie kote avile odothe, reprezentiringje pe kaj si taro odova regionia em lele nekobor humanitarno paketia. Aver khanči na lele. A ko odola FB em Twitter edicie nikote na sine vakerdo kaj aviule buteder Roma te den suporto e manušenge ko užariba e pervade kherenge sar volonteria.
A soske ko odola socialno netvorko FB em Twitter na hramonjena kaj baro numero nalegalno trgovcoa avile tari sasti Kroacia ko odola regionia so bikinen zarzavati, emiši em hajvabija (bakhre, gurumnja, bale, grasten..) avile palo phuvjakoro tinaniba ko Petrinje em Sisak, em džanlipaja kaj o manupa si ki dar em haos pire kamionencar kinena sine sa odola artiklia bagatelno lovenge em palo odova sa odola artiklia legaren len sine ko majbare dizja ki Kroacia em bikinen len sine deš droma majkuč.
E odola „nalegalno trgovcia“ nane li len nacionaliteto? Nali ola da dikhle kaj šaj te profitirinen biznisea taro akala čorole em traumatizirime dizutne taro Pterinje em Sisak. Ko jekh kana nekaste saste notirinea kaj si kriminalco em čor but lokheste šaj te ovel targeti taro atakia. Bi overl šukare kana sa odola „nalegalno biznismenia“ so kinen sine o zarzavati, emiši em o hajvanija te ove sikavde anavea , a na salde nacionalitetoa- Ama pusto balkansko tabijati!
