Si li vakti o Roma thaj i romani politikani elita te keren buti ko formiriba e „Romane politikane fronteske„?
Si li vakti te „otreznina amen“ em te ova realno kaj akava fronti šaj te anel desave politikane trampe, majbut ki romani jekhin.
Valjani li te dikha amen korkoro em te kera jekh retrospektiva napalal te šaj dikhaja i avdisutni situacia em ko savi deredža avilem . Te gejna sa so reslja i romani jekhin , a sa so našavgja pali implementacia e pluralizmoske an i Makedonia ka ovel salde našaviba vakti.
I gind si kaj trubul te irana „nevo lil“ A odova nevo lil prekal o RDS si aktivnosti prekal „Romano politikano fronti“. Sar trubul te funkcionirinel akava „Romano politikano fronti“?
Ko starti trubul te vakerel pe kaj valjani – eliminacia taro sa okola so korkoromangena pe, egoistia, stend ap politikantia, karieristia, dujmujale „instant političaria“ em okola so si korkoro notirime lideria jali lideria taro manuš partia.
Valjani manuša so ko avgo than ka ćhiven o interesia e Romane jekhinake a na partisko ili individualno Valjani jekhipe em barabutno aktiviteti. Valjani jekh a jekhipe , a na intrige em barikade.
Odova značinela kaj valjani jekhipa sar nikana dži akana. Te sine em trampa ko alusaribaskoro modaliteto odova si šansa amenge e Romenge te kera buti barabutne soske te hangigja pe asavko kanoni sar jekh alusaribaskiri jekhin em individualno akti bukvalno o rezultatia ka oven katastrofalno.
Barabutne kerde listencar em dži kote akceptirinel pe asavko alusaribaskoro modaliteti jekhe alusaribaskere jekhinake bizo prago, tegani na ka valjani , uslovno o potiken partie te khuvcen ko nesave angloalusaribaskere koalicie , numa sako partia ka šaj ikljol korkoro ko alusariba te prezentirinel piri programa thaj upral odoja fubda taro reslo suporto taro dizutne kote ko sa demokratsko thema ka keren pe kontraktoas bašo majodorigutni koalicia.
Akava si lačhi šansa barabiutne aktiviteteske sar – Romano politikano fronti.
O Romano politikano fronti ka ovel šukar te kergja buti sare sar jekh sa o romane politikane partie em barabutne te aven dži ki mangli resarin.
Ki odoja lista bi oven manuša so isi len pakjiv ki romani jekhin bizi diferenca savi politikni partiake preperela, Sa odola ki odoja lista so ka resen eventualno pakjiv taro elektorati em ka len pozicie jali ko Parlamenti, jali ko Govermenti (deputati, ministeri, vice ministeri) ko majodorigutno aktivizmi (akcepcia ko dujto em trinto ešaloni) tegani prioriteti ka ovel okole manušen em partie kaskere representoa nane ko Parlamenti jali Govermenti te šaj kerel pe jekh balansi.
Salde agjaar barabutne em jekhutne o Romano politikano fronti ka ovel importantno segmenti ko politikano aktiviteti em ka lel majučo than ki politikani em institucionalno hierarhia em faktori ko aniba politikane decizie.
Tegani ka našti but lokheste te oven o Roma chidime „ki rig“ em ko margine. Ola ka oven baro faktori ko aniba diferentno decizie ki them.
Panda jekh drom te vakerav kaj odoleske valjani hrabro, progresivno intelektualno persone kote bizo pardon em dar ka roden sa so valjani, Okola so si narcisoidno, egoistiam stend ap politikantia, karieristia, dujmujale, „instant političaria“ em korkoro notirime lideria jali lideri ki manuš partia, poltronia, foteljašia, šleperia em aver nane than ko Romano politikano fronti. Te džana amenge!
RDS sar inicijatori akale oopcijake ko Romano Politikano fronti si le strategia, idea en garancia bašo olakoro funkcioniribe. Sa o roga dži kote mangena but lokheste šaj avena em te phanen lafi e RDS –ea baši oleskiri realizacia. O RDS bešela tumenge ko raspolaganje.
