Ki komuna Bosilegrad majbut isi taro bugarsko nacionalno minjoriteti. Ki odoja statistika preperena em o Roma so dćivdinen odothje numa na kamen pobuter te oven Bugaria.
Trujal o plaina thaj o devrialia ko drumo primal o Bosilegard ko agor taro dakšimali Srbia ki simantra e Bugariaja. Tikno than tikne droma nekobor kafičia, em dukjane thaj komunalno baribina. Trujal o učipe nekobor gava. Ko duj kilometria dur odothar si I mahala laloš. Prekal olende odova si majbaro geto ko dakšđim e Srbiake. Odothe bešena o Roma.
Nekobor taro 300 Roma ko Laloš bešena ko limeno barake , akotor olendar ko khera ama bizo pani, elektrika em kanalizacia.
O Bosilegrad si le paše 7.000 dizutne majbut taro bugarsko nacionalno minjoriteti . O Vladimir Zahariev si president e komunake Bosilegrad. Ov vakerel kaj na dikhela deka isi nesavpo problem e Romencar taro Laloš em gejnela sa so kergja I komuna akale mahalake. Bašo popisi vakerel kaj o manuša taro Laloš pučle le sar te notirinen pe ko popisi: “ Šaj sine te vakeren sar so mangena ola- Ko Bosilegrad isi em 7-8 Eskimcora . Odova sikavela kaj o dizutne taro laloš šaj sine te vakeren so mangena. Pučle man: “ Sar tumen ka vakeren Presidento, so sijan tu_” me vakergjum olenge: „Me sium Bugari, sa mire parababa, parapau si Bugaria”. Palo odova ola vakergje: “Pa tegani amen da ka ova Bugaria” vakerel o Zahariev.
A palo odova majoficialno dopherela: “ Ko aver popis ka ovel šukar akala amre komšie kote sa akale berša bešaja akate barabutne te em te vakeren ola kaj si Roma, sar amen so vakeraja kaj siem Bugaria . Neka vakerel sako olendar kaj si Rom. Barabutne olencar sar so dživdingja dži akana šaj ka dživdina panda majšulkare. Barabutne ka kera buti ko proektia em ka ovel amren pobare šanse ko europsko proektoa dži kote vakerena kaj si Roma” vakerel o Zahariev.
O Romane aktivistia tari Srbia vakerena kaj e Romen salde manipulirinena . Ola vakeren kaj olengoro numero ki Srbia si paše 400.000 thaj 500.000 Roma , a oficialno ko Ofiso statistikake olengoro numero si: 148.000 Roma. Prekal olende akaja diferencia si konsekvenca taro manipilacie , sar so si čhinavipa em e školenge ko gavca, em aver seriozno bukja.
