Во општина Босилеград најбројно е бугарското национално малцинство. Во таа статистика спаѓаат и Роми кои живеат таму, но не сакаат веќе да бидат Бугари.
Низ планините и езерата на пат кон Босилеград на крајниот југ на Србија, на границата со Бугарија. Мало место, тесни улички, неколку кафулиња, неколку продавници и општински згради. Околу ридовите расфрлани села. На два километри оддалеченост е населбата Лалош. Според мештаните, тоа е најголемото гето на југот на Србија. Тука живеат Роми.
Некои од 300-те жители на Лалош живеат во лимени контејнери, а некои во куќи, но без вода, бањи и канализација, многумина и без струја.
Босилеград има околу 7.000 жители, главно бугарското национално малцинство.
Владимир Захариев е претседател на општина Босилеград. Тој вели дека не гледа дека има проблем со жителите на Лалош и набројува сѐ што направила општината за населбата. За пописот вели дека мештаните на Лалош дури го прашале како тој ќе се изјасни: „Можеа да се изјаснат како сакаат. Во Босилеград има дури седум-осум Ескими. Тоа значи дека и тие би можеле да се изјаснат како сакаат. Ме прашаа: „Како ќе се изјасните Претседателе?“, а јас им реков: „Јас сум Бугарин, сите мои прабаба и прадедо се Бугари“. Потоа тие извикуваа: „И ние сме Бугари“, вели Захариев.
А, потоа додава поофицијално: „На следниот попис би било добро нашите соседи, со кои живееме сите овие години, да се изјаснат како Роми, како што ние се декларираме како Бугари. Нека се изјаснат, ама буквално секој ако сака како Ром. Заедно со нив, како што живеевме досега, ќе живееме уште подобро. Заедно ќе работиме на проекти и ќе имаме поголеми шанси да добиеме проекти во Европа доколку се изјаснат како Роми“, сигурен е Захариев.
Ромските активисти од Србија тврдат дека во Србија Ромите се користат за разни манипулации. Во прилог на тоа се наведува дека, според податоците, во Србија има меѓу 400.000 и 500.000 Роми, додека официјално во Заводот за статистика пишува: 148.000 Роми. Според нив, оваа разлика е последица на бројни манипулации, меѓу кои го наведува и спречувањето на затворање училишта во селата, но и многу посериозни работи.
