Palo ofto divesa , mulo o 16 beršengoro Room tinejdžeri so sine phajrardo taro policajco ko vakti tari policiakiri racia an o Solun.
Taro hospitali kaj sine hospitalizirimo koo kritično sastipa, erati vakergje kaj o terno Rom mulo trujal so o doktoria kergje sa te kurtalinen le.
Ki koma ratvarinaja taro kuršumi ko šero o terno Rom ko solunsko hospitali sine ando ko 5 decembri ko duj o časo pali jekvaš I rakj , sine urgentno operisme thaj čhivdo ki intenzivno nega , kote ko sa akala nakhle dive sasljarela pe sine , numa ov mulo taro phare ratvarina.
O persi palokurko o 16 beršengoro Rom ačhilo ko benzisko stasioni phergja benzini bašo 20 eura thaj našlja bizo te pukjinel thaj sine informirimi I policia kote so o policajcia motorencar chidinngje palo odova vordon thaj kana na manglja te ačhol palo rodaripa taro policajcia primal o mediumia sine phajrardo ko šero taro jekh policajco.
O policajco so phajrargja ko terno Rom sine ikavdo anglal o kriso ko Solun thaj primal o grciakere medie vakergja kaj reagiringja sar reakcia te arakhelpe soske oleskere kolegaskoro dživdipa sine čhivdo ko riziko kaj o terno Rom manglja pire vordonea te khuvel ko motori, a bašo phajrariba vakerel kaj phajrargja tele ko gume e vordoneske a na ko čhavo.
O policajco akana si ko kherutno pritvor thaj dopherdo ka anel pe decizia ka ovel li legardo ko nesavo grčko phanlipa.
O ministeri civilno protektivake an I grcia so kerel opservacia thaj e policiake o Takis Teodorikakos prekal o Twitter sikavgja “ hor mazunipa bašo meriba e 16 beršengere Romeske thaj dži ki oleskiri familia”
-Palem vakerav kaj akava akti ka rodel pe jurisdikcia thaj džovaplipa so si jekhutne oficialno akti thaj te notirinen o faktia thaj te krisinel pe džovaplime. Savore te respektirina odova, hramosargja o Teodorikakos.
O nakhlo kurko sebepi akava akti ko buterder Romane mahale sar ki Atrina agjaar ko Solun , o Roma protestirinen sine seriozno. O IRU thaj olakoro president Zoran Dimov panda angleder jekh kkurko bičhavgja lil Reakcia dži ko oficialno grciakere govermenteskere ofisia (konkretnoo dji ki Grciakiri ambasada an o Skopje), numa bibahtake panda nane nisavo antvorto tari olengiri rig akale akteske.
