Ko 23 januari notirinen pe 81 berš taro racie. Sar sako berš i komemoracija ikergja pe ko kej e viktimenge taro racie ko Novi Sad.
Odova ratvalo kanuari an o 1942 berš kotor taro šerutno drumia an o Novi Sad , o ortodoksno limoria thaj ko avlina taro familiarno khera sine o thana kote so sine kerde o egzekucie.
O oficialno statistika vakerel kaj 1.400 civilia sine mudarde an o Novi Sad ko vakti taro trin divesengere racie mađkar 21 dži ko 23 januari 1942 berš, ama buteder vakerena kaj o numero taro viktimia si pobaro, dži ko 4.000 bašo akala trin divesa.
An o akala racie trujal Srblie, Javudie thaj Roma sine mudarde em avera konektiribaja em Ungarcia ko sine kontra odole režimoske. Akava terori an o Novi Sad na sine salde izolirimo incidenti numa jekh taro serie racie an o dizja thaj gava ko regionia tari Bačka, kote so sine egzekutirime em civilian.
O racie startujngje ko 4 januari 1942 berš ko gav Čurug, so si paše 40 kilometria taro Novi Sad, a palo odova buvljargja pe ko aver dizja thaj gava ko pašipa – Žabalj, Gjurgjevo, Gospoginci, Gardinovci, Vilovo, Lok, Mošorin, Šajkaši, Kišac, Srbobran,, Temerin thaj Bečej.
I šema sako drom sine isto: e ungariakoro askeri, policia, em žandarmeria astaren sine phanena sine , mučinen sine, mudaren sine civilen ko magacinia jali škole a palo odova frdena len sine ko šudre panja taro lenja Dunav thaj Tisa. Ko desave thana o viktimia sine egzekutirime em o korkoro trjal odoola lenja.
