O terno Rom so 15 berš na alo an i Makedonia, palo salde trin mečia khelde ko Skopje, vazdingja an o pre e makedonsko publika, thaj sikavgja kaj si o avtuno fudbalsko lideri.
Ov te khelel e Makedoniakere reprezentaciake ka ovel čačutno "maripa" soske i Belgia nane lokheste te chidel pe olestar. Upral o makedoniakoro fudbalsko del, ikljol nevi roš so trubul te ovel nevi fudbalsko čeren. Trujal so ni jekh drom na khelgja ko makedoniakoro klubi thaj ko agorutne 15 berša na alo an i Makedonia, o terno multitaletirano fudbaleri taro belgisko Anderleht, o Emil Abaz si o terno Rom so si le potenciali te ovel baro fudbaleri.
Oleskiri dživdipaskiri thaj fudbalsko paramis startujnel taro leskoro biando Skopje kana si biamo ko 17.01.1988 berš an o Brisel - Belgia. Odori o Emil džal pe familiaja kana sine le salde 1 berš bašo majlačho dživdipa.
Ov palo odova dikhel i fudbalsko topka. Aktivno startujngja te trenirinel fudbali ko ple 8 berša an o Antverpen, kote aktivno sine oleskoro pobaro phral. O talenti thaj o džanlipa kerel ma te ačhol ko akava klubi trujal so o Antvertpen sine le šukar ternengiri fudbalsko škola. Palo duj nakhle berša ko akava klubi ov džala Germinal Bershot, klubi taro Brisel, kote ačhola trin berša. O sakutia taro bare fudbalsko klubia ko plo tevteri si anava taro Emil Abaz. Persi berš ov, oleskoro dat thaj oleskoro menadžeri anen decizia te džal ko Anderleht, klubi kote si le sa o predispozicie te ovelč baro fudbaleri.
Sar sine o Emil arakhlo taro makedonikane stručnakia te khelel baši Makedonia? O eks makedonsko fudbaleri an o FK Vardar thaj internacionalco, o Igor Saša Nikolovski, kote akana dživdinel thaj kerel buti an i Belgia. Ov informiringja e e Alene ko direktori e Nacionalno fudbalsko federaciake o Petar Miloševski. Ola ale ko kontakti e familiaja taro Emil Abaz thaj sine akhardo an o amalkinao meči mujal i Italia.
" Agaar si. O Nikolovski thaj Miloševski si odola keregje akana te khelav baši Makedonia. Ko momenti me nasium sigurno sar te kerav, soske na aljum 15 berš an i Makedonia numa akaja decizia akanaske angje mo dat thaj o menadžeri o Zoran Samardžia, bosanco so kerel buti an i Belgia. Trubul te akcentirinav kaj panda sium an i dilema kaske te khelav dali baši Belgia jali Makedonia numa si vakti te anava definitivno decizia.Mande an o momenti si man salde makedonikano pasporto , a o mečia so khelgjum baši Belgia sine taro amalikano karakteri, numa mlo klubi o Anderleht ko momenti kerel seriozno zorti te lav belgisko dokumentia " - realno si o Emil Abaz kote havljarel kaj šaj "te našel " tari makedonikani reprezentacia thaj te khelel baši Belgia
